naya chand

aaj shab chāñd ḳhushnumā niklā

saarī duniyā kā dilrubā niklā

siiñg chhoTe haiñ do taraf nikle

ḳhushnumā nāzuk aur chamkīle

ḳhushnumā thā na chāñd aisā kabhī

sab ko sīñgoñ kī raushnī bhaa.ī

na baḌhegā umiid hai phir vo

na chaḌhegā umiid hai phir vo

kaash manzil kī us ke rah paatā

dostoñ ko bhī saath le jaatā

is fazā se jo paar hotā maiñ

jā ke us par savār hotā maiñ

baiTh jaatā maiñ beach meñ us ke

donoñ hāthoñ meñ thaam letā sire

achchhā sā hotā merā gahvāra

kis qadar dil-fareb aur pyārā

phir vahāñ se pukārtā taaro

raah se merī duur haT jaao

taaki jis dam mirī savārī chale

muft rauñde na jaao paañv tale

maiñ na jā.ūñgā vaañ se aur kahīñ

sub.h tak jhūltā rahūñgā vahīñ

dekhūñ jaatā hai merā chāñd kahāñ

aur paḌtā hai jā ke maañd kahāñ

ḳhushnumā koī āsmāñ sā nahīñ

Thaharte ham ḳhushī ḳhushī se vahīñ

dekhte vaañ tulūa sūraj kā

us munavvar charāġh kā jalvā

saare din is ko ḳhuub dekhte ham

shaam meñ phir ġhurūb dekhte ham

baiTh kar phir dhanak pe ghar aate

vaañ ke qissoñ se sab ko taḌpāte

aaj shab chand KHushnuma nikla

sari duniya ka dilruba nikla

sing chhoTe hain do taraf nikle

KHushnuma nazuk aur chamkile

KHushnuma tha na chand aisa kabhi

sab ko singon ki raushni bhai

na baDhega umid hai phir wo

na chaDhega umid hai phir wo

kash manzil ki us ke rah pata

doston ko bhi sath le jata

is faza se jo par hota main

ja ke us par sawar hota main

baiTh jata main beach mein us ke

donon hathon mein tham leta sire

achchha sa hota mera gahwara

kis qadar dil-fareb aur pyara

phir wahan se pukarta taro

rah se meri dur haT jao

taki jis dam meri sawari chale

muft raunde na jao panw tale

main na jaunga wan se aur kahin

subh tak jhulta rahunga wahin

dekhun jata hai mera chand kahan

aur paDta hai ja ke mand kahan

KHushnuma koi aasman sa nahin

Thaharte hum KHushi KHushi se wahin

dekhte wan tulua suraj ka

us munawwar charagh ka jalwa

sare din is ko KHub dekhte hum

sham mein phir ghurub dekhte hum

baiTh kar phir dhanak pe ghar aate

wan ke qisson se sab ko taDpate