naya chand

are bhaa.ī aḳhtar tū kyā dekhtā hai

sar-e-shām koThe pe kyoñ chaḌh gayā hai

qamar bhaa.ī aao idhar aao tum bhī

ki dekhūñ tumhārī nazar kī bhī tezī

zarā sāmne dekho surḳhī se uupar

vo bādal ke TukḌe se thoḌā sā haT kar

nazar aa gayā mujh ko haañ maiñ ne dekhā

a hā hā nayā chāñd niklā a hā hā

nayā chāñd bhī vaah kyā ḳhushnumā hai

zarā sā hai bārīk hai phāñk sā hai

ajab ḳhūbsūrat ajab pyārā pyārā

baḌe chhoTe kī aañkh kā hai ye taarā

ḳhudā ne use āsmāñ par biThāyā

ye rutba na.e chāñd ne jhuk ke paayā

use jhukne se izzat aisī milī hai

ki baḌh baḌh ke ḳhalq-e-ḳhudā dekhtī hai

sar ūñchā usī kā hai jo sar jhukā.e

tavāzo.a se har ek se pesh aa.e

na.e chāñd kī tarah gardan jhukānā

ki aa.e ziyārat ko saarā zamāna

are bhai aKHtar tu kya dekhta hai

sar-e-sham koThe pe kyon chaDh gaya hai

qamar bhai aao idhar aao tum bhi

ki dekhun tumhaari nazar ki bhi tezi

zara samne dekho surKHi se upar

wo baadal ke TukDe se thoDa sa haT kar

nazar aa gaya mujh ko han main ne dekha

a ha ha naya chand nikla a ha ha

naya chand bhi wah kya KHushnuma hai

zara sa hai barik hai phank sa hai

ajab KHubsurat ajab pyara pyara

baDe chhoTe ki aankh ka hai ye tara

KHuda ne use aasman par biThaya

ye rutba nae chand ne jhuk ke paya

use jhukne se izzat aisi mili hai

ki baDh baDh ke KHalq-e-KHuda dekhti hai

sar uncha usi ka hai jo sar jhukae

tawazoa se har ek se pesh aae

nae chand ki tarah gardan jhukana

ki aae ziyarat ko sara zamana