naya hukm-nama

kisī kā hukm hai saarī havā.eñ

hamesha chalne se pahle batā.eñ

ki un kī samt kyā hai

kidhar jā rahī haiñ

havāoñ ko batānā ye bhī hogā

chaleñgī ab to kyā raftār hogī

havāoñ ko ye ijāzat nahīñ hai

ki āñdhī kī ijāzat ab nahīñ hai

hamārī ret kī sab ye fasīleñ

ye kāġhaz ke mahal jo ban rahe haiñ

hifāzat un kī karnā hai zarūrī

aur āñdhī hai purānī in kī dushman

ye sabhī jante haiñ

kisī kā hukm hai dariyā kī lahreñ

zarā ye sar-kashī kam kar leñ apnī had meñ Thahreñ

ubharnā phir bikharnā aur bikhar kar phir ubharnā

ġhalat hai ye un kā hañgāma karnā

ye sab hai sirf vahshat kī alāmat

baġhāvat kī alāmat

baġhāvat to nahīñ bardāsht hogī

ye vahshat to nahīñ bardāsht hogī

agar lahroñ ko hai dariyā meñ rahnā

to un ko hogā ab chup-chāp bahnā

kisī kā hukm hai

is gulistāñ meñ bas ik rañg ke hī phuul hoñge

kuchh afsar hoñge jo ye tai kareñge

gulistāñ kis tarah banñā hai kal kā

yaqīnan phuul to yak-rañgīñ hoñge

magar ye rañg hogā kitnā gahrā kitnā halkā

ye afsar tai kareñge

kisī ko ye koī kaise batā.e

gulistāñ meñ kahīñ bhī phuul yak-rangīñ nahīñ hote

kabhī ho hī nahīñ sakte

ki har ik rañg meñ chhup kar bahut se rañg rahte haiñ

jinhoñne bāġh-e-yakrangīñ banānā chāhe the

un ko zarā dekho

ki jab ik rañg meñ sau rañg zāhir ho ga.e haiñ to

kitne pareshāñ haiñ kitne tañg rahte haiñ

kisī ko ye koī kaise batā.e

havā.eñ aur lahreñ kab kisī kā hukm suntī haiñ

havā.eñ hākimoñ kī muTThiyoñ meñ hathkaḌī meñ

qaid-ḳhānoñ meñ nahīñ ruktīñ

ye lahreñ rokī jaatī haiñ

to dariyā kitnā bhī ho pur-sukūñ betāb hotā hai

aur is betābī kā aglā qadam sailāb hotā hai

kisi ka hukm hai sari hawaen

hamesha chalne se pahle bataen

ki un ki samt kya hai

kidhar ja rahi hain

hawaon ko batana ye bhi hoga

chalengi ab to kya raftar hogi

hawaon ko ye ijazat nahin hai

ki aandhi ki ijazat ab nahin hai

hamari ret ki sab ye fasilen

ye kaghaz ke mahal jo ban rahe hain

hifazat un ki karna hai zaruri

aur aandhi hai purani in ki dushman

ye sabhi jante hain

kisi ka hukm hai dariya ki lahren

zara ye sar-kashi kam kar len apni had mein Thahren

ubharna phir bikharna aur bikhar kar phir ubharna

ghalat hai ye un ka hangama karna

ye sab hai sirf wahshat ki alamat

baghawat ki alamat

baghawat to nahin bardasht hogi

ye wahshat to nahin bardasht hogi

agar lahron ko hai dariya mein rahna

to un ko hoga ab chup-chap bahna

kisi ka hukm hai

is gulistan mein bas ek rang ke hi phul honge

kuchh afsar honge jo ye tai karenge

gulistan kis tarah banna hai kal ka

yaqinan phul to yak-rangin honge

magar ye rang hoga kitna gahra kitna halka

ye afsar tai karenge

kisi ko ye koi kaise batae

gulistan mein kahin bhi phul yak-rangin nahin hote

kabhi ho hi nahin sakte

ki har ek rang mein chhup kar bahut se rang rahte hain

jinhonne bagh-e-yakrangin banana chahe the

un ko zara dekho

ki jab ek rang mein sau rang zahir ho gae hain to

kitne pareshan hain kitne tang rahte hain

kisi ko ye koi kaise batae

hawaen aur lahren kab kisi ka hukm sunti hain

hawaen hakimon ki muTThiyon mein hathkaDi mein

qaid-KHanon mein nahin ruktin

ye lahren roki jati hain

to dariya kitna bhi ho pur-sukun betab hota hai

aur is betabi ka agla qadam sailab hota hai