naya ishq

ek arse se

jazbāt-o-ehsās kī vādī-e-ishq kī bastī

na.e purāne sabhī makān tamannāoñ ke

khulī chhateñ ahd-o-paimāñ kī

band jharoke ke ārzūoñ ke

nīm-shikasta dīvār-o-dar armānoñ ke

ummīdoñ ke ūñche nīche lambe chauḌe

giile aur pathrīle raste

rāhat ke ashjār sukūñ kī duub tarab kī ḳhud-rav beleñ

rañg-birañgī soch ke phūloñ kī shatranjī

mahrūmī kī ūñchī choTī

tanhā.ī kī jān-levā Dhalvān dukhoñ kī saḳht chaTTāneñ dard kī khaa.ī

sab par yaas kī barf jamī thī

chāroñ jānib

ThanDī aur be-jān safedī phail rahī thī

jīvan kyā thā ek kafan thā

jis ke andar

ḳhud ko apne yaḳh-basta siine se lagā.e

maiñ ik zinda laash kī sūrat paḌā huā thā

dil ke vīrāne meñ kuchh be-chehra lamhe

āsebī sāyoñ kī sūrat

kaañp rahe the haañp rahe the

aaj achānak

ek parī-chehra

mere chehre se be-rañg kafan sarkā kar

mere kaan meñ sargoshī kī

merī aañkh meñ jhāñk kar bolī

uTh aur dekh

tire dil kī be-ḳhabar dhaḌkan meñ

kitnā pyārā kitnā dil-āvez siyāh gulāb khilā hai

ek arse se

jazbaat-o-ehsas ki wadi-e-ishq ki basti

nae purane sabhi makan tamannaon ke

khuli chhaten ahd-o-paiman ki

band jharoke ke aarzuon ke

nim-shikasta diwar-o-dar armanon ke

ummidon ke unche niche lambe chauDe

gile aur pathrile raste

rahat ke ashjar sukun ki dub tarab ki KHud-raw belen

rang-birangi soch ke phulon ki shatranji

mahrumi ki unchi choTi

tanhai ki jaan-lewa Dhalwan dukhon ki saKHt chaTTanen dard ki khai

sab par yas ki barf jami thi

chaaron jaanib

ThanDi aur be-jaan safedi phail rahi thi

jiwan kya tha ek kafan tha

jis ke andar

KHud ko apne yaKH-basta sine se lagae

main ek zinda lash ki surat paDa hua tha

dil ke virane mein kuchh be-chehra lamhe

aasebi sayon ki surat

kanp rahe the hanp rahe the

aaj achanak

ek pari-chehra

mere chehre se be-rang kafan sarka kar

mere kan mein sargoshi ki

meri aankh mein jhank kar boli

uTh aur dekh

tere dil ki be-KHabar dhaDkan mein

kitna pyara kitna dil-awez siyah gulab khila hai