naya makan

chalo makāñ kī musībat se bhī najāt milī

ye ḳhvāb-gah, ye kitchen, ġhusl-ḳhāne aur baiThak

maiñ sochtā huuñ mujhe sochne ko baat milī

huī haiñ sirf mashaqqat kī koshisheñ an-thak

nazar-rubā dar-o-dīvār ke banāne meñ

ye qumqume ye tamaddun kī iḳhtirā-e-jadīd

baḌhī zalālat-e-idrāk tīrgī na miTī

ye sīḌhiyāñ haiñ nigāhoñ ke pech kī maz.har

hayāt kī koī pechīdgī na duur huī

magar maiñ mahv huuñ idbār ke miTāne meñ

ye sīḌhiyāñ haiñ jo in par se gir paḌe koī

barī ghaḌī na ḳhudā laa.e jaane kab aa jaa.e

ye chiknā farsh ise dekhtā rahe koī

jo kal ko paañv tumhārā kahīñ phisal jaa.e

ḳhudā karam kare merā to dam nikal jaa.e

maiñ sochtā huuñ mujhe soch kā junūñ jo huā

ye mere zehn kā māhaul pur-fusūñ jo huā

ye merā zehn mujhe le chalā hai duur kahīñ

vahāñ jahāñ kabhī pahle bhī thā makāñ apnā

falak ke saa.e meñ ham the kabhī panāh-guzīñ

ye farsh-e-ḳhāk thā qālīn-e-zar-fashāñ apnā

ye mahr o maah ye taare the apne ghar ke diye

gul-o-gayā se hai labrez pur-bahār zamīñ

jilau meñ husn liye dāvat-e-nazar ke liye

kabhī hamāre liye thī nashist-gāh-e-hasīñ

ye zulf pech se begāna mauj-e-sahbā thī

ki jis kā barsoñ mirī uñgliyāñ rahīñ shānā

ye terī hamdamī ik kaifiyat thī nashsha bhī

jahāñ bhī chāhnā fauran vahīñ chale jaanā

vo sub.h sāhil-e-dariyā vo shaam zer-e-chīnār

guzar ga.ī vo masarrat kī sub.h-o-shām apnī

hamāre dosh pe jab thā na jabr-o-qadr kā baar

chalo chalo ye hikāyat hai talḳh-kām apnī

uTho uTho dar-o-dīvār ko sajānā hai

makāñ ko ghahnoñ-ladī ik dulhan banānā hai

chalo makan ki musibat se bhi najat mili

ye KHwab-gah, ye kitchen, ghusl-KHane aur baiThak

main sochta hun mujhe sochne ko baat mili

hui hain sirf mashaqqat ki koshishen an-thak

nazar-ruba dar-o-diwar ke banane mein

ye qumqume ye tamaddun ki iKHtira-e-jadid

baDhi zalalat-e-idrak tirgi na miTi

ye siDhiyan hain nigahon ke pech ki mazhar

hayat ki koi pechidgi na dur hui

magar main mahw hun idbar ke miTane mein

ye siDhiyan hain jo in par se gir paDe koi

bari ghaDi na KHuda lae jaane kab aa jae

ye chikna farsh ise dekhta rahe koi

jo kal ko panw tumhaara kahin phisal jae

KHuda karam kare mera to dam nikal jae

main sochta hun mujhe soch ka junun jo hua

ye mere zehn ka mahaul pur-fusun jo hua

ye mera zehn mujhe le chala hai dur kahin

wahan jahan kabhi pahle bhi tha makan apna

falak ke sae mein hum the kabhi panah-guzin

ye farsh-e-KHak tha qalin-e-zar-fashan apna

ye mahr o mah ye tare the apne ghar ke diye

gul-o-gaya se hai labrez pur-bahaar zamin

jilau mein husn liye dawat-e-nazar ke liye

kabhi hamare liye thi nashist-gah-e-hasin

ye zulf pech se begana mauj-e-sahba thi

ki jis ka barson meri ungliyan rahin shana

ye teri hamdami ek kaifiyat thi nashsha bhi

jahan bhi chahna fauran wahin chale jaana

wo subh sahil-e-dariya wo sham zer-e-chinar

guzar gai wo masarrat ki subh-o-sham apni

hamare dosh pe jab tha na jabr-o-qadr ka bar

chalo chalo ye hikayat hai talKH-kaam apni

uTho uTho dar-o-diwar ko sajaana hai

makan ko ghahnon-ladi ek dulhan banana hai