naya sal mubarak

aa bād-e-sabā aa ki nayā saal mubārak

lā jald ḳhabar lā ki nayā saal mubārak

ḳhāmosh na ho jaa.eñ kahīñ dhaḌkaneñ dil kī

āvāz diye jā ki nayā saal mubārak

phūTīñ to kisī samt se ummīd kī kirneñ

ai raat kahe jā ki nayā saal mubārak

kyā ḳhuub hai ik hamdam-e-derīna kā milnā

aur mil ke ye kahnā ki nayā saal mubārak

shānoñ pe bikharne kī huī riit purānī

ai zulf sañvar jā ki nayā saal mubārak

ḳhvābīda tamannāoñ ko bedār to kar luuñ

ai vaqt Thahar jā ki nayā saal mubārak

dāman tirā ḳhālī hai to ai vaqt tujhe kyā

tū kah ke guzar jā ki nayā saal mubārak

pyāsoñ ke muqaddar meñ na aaya koī qatra

kahtā rahā dariyā ki nayā saal mubārak

ḳhūbān-e-vatan bhuul ga.e ab ke baras bhī

'iqbāl' se kahnā ki nayā saal mubārak

aa baad-e-saba aa ki naya sal mubarak

la jald KHabar la ki naya sal mubarak

KHamosh na ho jaen kahin dhaDkanen dil ki

aawaz diye ja ki naya sal mubarak

phuTin to kisi samt se ummid ki kirnen

ai raat kahe ja ki naya sal mubarak

kya KHub hai ek hamdam-e-derina ka milna

aur mil ke ye kahna ki naya sal mubarak

shanon pe bikharne ki hui rit purani

ai zulf sanwar ja ki naya sal mubarak

KHwabida tamannaon ko bedar to kar lun

ai waqt Thahar ja ki naya sal mubarak

daman tera KHali hai to ai waqt tujhe kya

tu kah ke guzar ja ki naya sal mubarak

pyason ke muqaddar mein na aaya koi qatra

kahta raha dariya ki naya sal mubarak

KHuban-e-watan bhul gae ab ke baras bhi

'iqbaal' se kahna ki naya sal mubarak