naya safar hai purane charag gul kar do

fareb-e-jannat-e-fardā ke jaal TuuT ga.e

hayāt apnī umīdoñ pe sharmsār sī hai

chaman meñ jashn-e-varūd-e-bahār ho bhī chukā

magar nigāh-e-gul-o-lāla sogvār sī hai

fazā meñ garm bagūloñ kā raqs jaarī hai

ufuq pe ḳhuun kī miinā chhalak rahī hai abhī

kahāñ kā mahr-e-munavvar kahāñ kī tanvīreñ

ki bām-o-dar pe siyāhī jhalak rahī hai abhī

fazā.eñ soch rahī haiñ ki ibn-e-ādam ne

ḳhirad gañvā ke junūñ aazmā ke kyā paayā

vahī shikast-e-tamannā vahī ġham-e-ayyām

nigār-e-zīst ne sab kuchh luTā ke kyā paayā

bhaTak ke rah ga.iiñ nazreñ ḳhalā kī vus.at meñ

harīm-e-shāhid-e-rā.anā kā kuchh pata na milā

tavīl rāhguzar ḳhatm ho ga.ī lekin

hanūz apnī masāfat kā muntaha na milā

safar-nasīb rafīqo qadam baḌhā.e chalo

purāne rāh-numā lauT kar na dekheñge

tulū-e-sub.h se tāroñ kī maut hotī hai

shaboñ ke rāj-dulāre idhar na dekheñge

fareb-e-jannat-e-farda ke jal TuT gae

hayat apni umidon pe sharmsar si hai

chaman mein jashn-e-warud-e-bahaar ho bhi chuka

magar nigah-e-gul-o-lala sogwar si hai

faza mein garm bagulon ka raqs jari hai

ufuq pe KHun ki mina chhalak rahi hai abhi

kahan ka mahr-e-munawwar kahan ki tanwiren

ki baam-o-dar pe siyahi jhalak rahi hai abhi

fazaen soch rahi hain ki ibn-e-adam ne

KHirad ganwa ke junun aazma ke kya paya

wahi shikast-e-tamanna wahi gham-e-ayyam

nigar-e-zist ne sab kuchh luTa ke kya paya

bhaTak ke rah gain nazren KHala ki wusat mein

harim-e-shahid-e-raana ka kuchh pata na mila

tawil rahguzar KHatm ho gai lekin

hanuz apni masafat ka muntaha na mila

safar-nasib rafiqo qadam baDhae chalo

purane rah-numa lauT kar na dekhenge

tulu-e-subh se taron ki maut hoti hai

shabon ke raj-dulare idhar na dekhenge