naya sal

raat kī uḌtī huī raakh se bojhal hai nasīm

yuuñ asā Tek ke chaltī hai ki rahm aatā hai

saañs letī hai daraḳhtoñ kā sahārā le kar

aur jab us ke libāde se lipaT kar koī

patta girtā hai to patthar sā luḌhak jaatā hai

shāḳheñ hāthoñ meñ liye kitnī adhūrī kaliyāñ

māñgtī haiñ faqat ik narm sī jumbish kī duā

aisā chup-chāp hai sañvlā.ī huī sub.h meñ shahr

jaise mābad kisī murjhā.e hue maz.hab kā

sar pe apnī hī shikastoñ ko uThā.e hue log

ik dorāhe pe girohoñ meñ khaḌe haiñ tanhā

yak-ba-yak fāsle tāñbe kī tarah bajne lage

qadam uThte haiñ to zarre bhī sadā dene lage

dard ke pairhan-e-chāk se jhāñko to zarā

murda sūraj pe laTakte hue maile bādal

kisī tūfān kī aamad kā patā dete haiñ!

raat ki uDti hui rakh se bojhal hai nasim

yun asa Tek ke chalti hai ki rahm aata hai

sans leti hai daraKHton ka sahaara le kar

aur jab us ke libaade se lipaT kar koi

patta girta hai to patthar sa luDhak jata hai

shaKHen hathon mein liye kitni adhuri kaliyan

mangti hain faqat ek narm si jumbish ki dua

aisa chup-chap hai sanwlai hui subh mein shahr

jaise mabad kisi murjhae hue mazhab ka

sar pe apni hi shikaston ko uThae hue log

ek dorahe pe girohon mein khaDe hain tanha

yak-ba-yak fasle tanbe ki tarah bajne lage

qadam uThte hain to zarre bhi sada dene lage

dard ke pairhan-e-chaak se jhanko to zara

murda suraj pe laTakte hue maile baadal

kisi tufan ki aamad ka pata dete hain!