naya sal mubarak

nayā saal tum ko mubārak ho bachcho

sadā ḳhush raho tum phalo aur phūlo

ḳhudā kī ināyat rahe tum pe daa.em

hamesha raho sīdhe raste pe qaa.em

taraqqī karo ilm meñ aur hunar meñ

bulandī ho paidā tumhārī nazar meñ

ġharīboñ kī imdād karte raho tum

dam un kī mohabbat kā bharte raho tum

raho tum hamesha qavī aur tavānā

zamāna pukāre tumheñ kah ke daanā

jo bigḌe bhī hoñ kaam un ko sambhālo

kabhī aaj kā kaam kal par na Taalo

bano nek nekī tumhārā chalan ho

bhalā.ī kī dhun meñ hamesha magan ho

raho sukh se daa.em na dukh paas aa.e

ḳhudā tum ko bīmāriyoñ se bachā.e

duā hai ye 'nayyar' kī tum naam paao

aur is saal meñ kuchh na kuchh kar dikhāo

naya sal tum ko mubarak ho bachcho

sada KHush raho tum phalo aur phulo

KHuda ki inayat rahe tum pe daem

hamesha raho sidhe raste pe qaem

taraqqi karo ilm mein aur hunar mein

bulandi ho paida tumhaari nazar mein

gharibon ki imdad karte raho tum

dam un ki mohabbat ka bharte raho tum

raho tum hamesha qawi aur tawana

zamana pukare tumhein kah ke dana

jo bigDe bhi hon kaam un ko sambhaalo

kabhi aaj ka kaam kal par na Talo

bano nek neki tumhaara chalan ho

bhalai ki dhun mein hamesha magan ho

raho sukh se daem na dukh pas aae

KHuda tum ko bimariyon se bachae

dua hai ye 'nayyar' ki tum nam pao

aur is sal mein kuchh na kuchh kar dikhao