nazm

agar qaum kī hai taraqqī kī ḳhvāhish

suno kaan dhar ke hamārī guzārish

ġhurūr-o-havas kā namūna amīrī

baḌī is se hindostāñ meñ faqīrī

tavañgar vahī hai jo rahtā hai qaane

ġharīboñ kī ḳhidmat na ho jis ko maane

ġharīboñ se hans hans ke karte haiñ nafrat

samajhte haiñ apne ko haqdār daulat

sazā-vār un ko amīrī nahīñ hai

jinheñ ādat-e-dast-gīrī nahīñ hai

tavañgar ġharīboñ pe kyoñ nukta-chīñ haiñ

ġharībī kisī kā gunāh to nahīñ hai

bhare haiñ jo daulat se tum ne ḳhazāne

karo qaa.em us se yahāñ kār-ḳhāne

ghaTegī nahīñ is se daulat tumhārī

baḌhegī ġharīboñ meñ izzat tumhārī

ġharīboñ ko mehnat kā pesha milegā

dūkānoñ pe savdeshī saudā milegā

taraqqī hai qaum-o-vatan kī isī se

bahāreñ haiñ apne vatan kī isī se

jo gahrā.iyoñ meñ ye paanī ravāñ hai

karo is se sairāb sahrā jo yaañ hai

agar qaum ki hai taraqqi ki KHwahish

suno kan dhar ke hamari guzarish

ghurur-o-hawas ka namuna amiri

baDi is se hindostan mein faqiri

tawangar wahi hai jo rahta hai qane

gharibon ki KHidmat na ho jis ko mane

gharibon se hans hans ke karte hain nafrat

samajhte hain apne ko haqdar daulat

saza-war un ko amiri nahin hai

jinhen aadat-e-dast-giri nahin hai

tawangar gharibon pe kyon nukta-chin hain

gharibi kisi ka gunah to nahin hai

bhare hain jo daulat se tum ne KHazane

karo qaem us se yahan kar-KHane

ghaTegi nahin is se daulat tumhaari

baDhegi gharibon mein izzat tumhaari

gharibon ko mehnat ka pesha milega

dukanon pe sawdeshi sauda milega

taraqqi hai qaum-o-watan ki isi se

bahaaren hain apne watan ki isi se

jo gahraiyon mein ye pani rawan hai

karo is se sairab sahra jo yan hai