nazm

bahut zarūrī baat ik tum se karnā thī

lekin tum ko jaldī bahut thī jaane kī

kahnā ye thā ham to mashriq maġhrib haiñ

mere haañ to koī drawing-rōm nahīñ

koī bairā na koī baTlar na koī māmāñ-shāmāñ

koī garage na koī car koī driver na ḳhānsāmāñ

ek hī kamra hai jo merī study bhī hai bedrōm bhī hai aur

drawing-rōm bhī merā

maiñ ik kamre meñ rahtā huuñ

apne andar rahtā huuñ

apne andar rah kar bhī maiñ ik duniyā meñ rahtā huuñ

jabhī kahā thā ham to mashriq maġhrib haiñ

mashriq maġhrib meñ jo farq hai

ye vo ġhulām hī jāneñ

do Dhaa.ī sau saal ġhulāmī kī jo beḌiyāñ

kāTte kāTte qabroñ meñ jā so.e

haa.e allāh un jaisā bad-qismat koī aur yahāñ

na hue

achchhā kiyā tum chalī ga.iiñ

merī bātoñ meñ kuchh talḳhī aa ga.ī hai

tere aabā ne mere aabā par jo zulm kiyā hai

vo to merī maañ ke duudh ne mujhe virāsat

meñ baḳhshā hai

bahut zaruri baat ek tum se karna thi

lekin tum ko jaldi bahut thi jaane ki

kahna ye tha hum to mashriq maghrib hain

mere han to koi drawing-room nahin

koi baira na koi baTlar na koi maman-shaman

koi garage na koi car koi driwer na KHansaman

ek hi kamra hai jo meri study bhi hai bedroom bhi hai aur

drawing-room bhi mera

main ek kamre mein rahta hun

apne andar rahta hun

apne andar rah kar bhi main ek duniya mein rahta hun

jabhi kaha tha hum to mashriq maghrib hain

mashriq maghrib mein jo farq hai

ye wo ghulam hi jaanen

do Dhai sau sal ghulami ki jo beDiyan

kaTte kaTte qabron mein ja soe

hae allah un jaisa bad-qismat koi aur yahan

na hue

achchha kiya tum chali gain

meri baaton mein kuchh talKHi aa gai hai

tere aaba ne mere aaba par jo zulm kiya hai

wo to meri man ke dudh ne mujhe wirasat

mein baKHsha hai