nazm

ai ḳhudā tere sahīfoñ meñ yahī likkhā hai

tū ne paidā hai kiyā sab ko hī ik fitrat par

dahr meñ aatā hai har bachcha isī fitrat par

phir zarā ye bhī batā de ki vo fitrat kyā hai

kuchh batāte hī nahīñ haiñ ye tire nau-maulūd

itne rastoñ meñ bhalā kaun sā vo rasta hai

fitratoñ meñ se bhalā kaun sī vo fitrat hai

kaun zālim thā ki jis ne tirī fitrat chhoḌī

kaun the log ki jin logoñ ne raste badle

kyā ye behtar na thā ik raah pe qaa.em rahte

kyā ye achchhā na thā bas ek hī manzil hotī

kam se kam hotī zamāne meñ na bejā tafrīq

kam se kam log ḳhudā ko to na rusvā karte

kam se kam buġhz na hotā yuuñ kisī ke diiñ se

kam se kam log payambar ko ḳhudā na kahte

kaash hotā na zamāne meñ yuuñ adyān kā farq

nasl kā chehre kā ḳhad-ḳhāl kā pahchān kā farq

ahl-e-hindū kā masīhī kā musalmān kā farq

dahr ke bejā aqā.ed kā aur īmān kā farq

is se pahle ki mirī jaan hī le leñ ye savāl

ai ḳhudā bhej de ab āḳhirī us haadī ko

jis ke aane pe hai īmān har ik maz.hab kā

aur phir vo hī batā.e ki vo fitrat kyā hai

jis pe paidā hai kiyā tū ne har ik insāñ ko

ai KHuda tere sahifon mein yahi likkha hai

tu ne paida hai kiya sab ko hi ek fitrat par

dahr mein aata hai har bachcha isi fitrat par

phir zara ye bhi bata de ki wo fitrat kya hai

kuchh batate hi nahin hain ye tere nau-maulud

itne raston mein bhala kaun sa wo rasta hai

fitraton mein se bhala kaun si wo fitrat hai

kaun zalim tha ki jis ne teri fitrat chhoDi

kaun the log ki jin logon ne raste badle

kya ye behtar na tha ek rah pe qaem rahte

kya ye achchha na tha bas ek hi manzil hoti

kam se kam hoti zamane mein na beja tafriq

kam se kam log KHuda ko to na ruswa karte

kam se kam bughz na hota yun kisi ke din se

kam se kam log payambar ko KHuda na kahte

kash hota na zamane mein yun adyan ka farq

nasl ka chehre ka KHad-KHal ka pahchan ka farq

ahl-e-hindu ka masihi ka musalman ka farq

dahr ke beja aqaed ka aur iman ka farq

is se pahle ki meri jaan hi le len ye sawal

ai KHuda bhej de ab aaKHiri us hadi ko

jis ke aane pe hai iman har ek mazhab ka

aur phir wo hi batae ki wo fitrat kya hai

jis pe paida hai kiya tu ne har ek insan ko