nazm

har aadmī hai kisī justujū meñ bhaTkā huā

har ek shaḳhs ġham-e-lā-zavāl meñ gum hai

ye āftāb bhī TuuTā huā sā lagtā hai

ye kā.enāt bhī bikhrī huī sī lagtī hai

ye raushnī bhī hai tārīkiyoñ kī parvarda

ye zindagī bhī kisī kaalī raat jaisī hai

ye uljhaneñ ye masā.il ye rozgār ke ġham

ye husn-o-ishq kī bāteñ ye intizār ke ġham

baham haiñ aaj ye māzī-o-hāl-o-mustaqbil

mire shu.ūr kī rau meñ simaT ga.e jaise

mire sivā sabhī maujūd haiñ mire nazdīk

maiñ sab ko dekhtā rahtā huuñ apnī āñkhoñ se

bas ek maiñ huuñ jo ḳhud ko nazar nahīñ aatā

ye mere hone na hone kī ibtidā kyā thī

ye mere hone na hone kī intihā kyā hai

samajh meñ kuchh nahīñ aatā ki kis tarah se jiyūñ

falak pe ruuh mirī uḌ rahī hai sadiyoñ se

badan uThā.e hue hai abhī zamīn kā bojh

mire thake hue kāñdhe pe kaun rakhtā hai

kabhī gumān kī gaThrī kabhī yaqīn kā bojh

mire vajūd-o-adam kī ye jang to dekho

zarā ḳhudā kī ḳhudā.ī kā rang to dekho

har aadmi hai kisi justuju mein bhaTka hua

har ek shaKHs gham-e-la-zawal mein gum hai

ye aaftab bhi TuTa hua sa lagta hai

ye kaenat bhi bikhri hui si lagti hai

ye raushni bhi hai tarikiyon ki parwarda

ye zindagi bhi kisi kali raat jaisi hai

ye uljhanen ye masail ye rozgar ke gham

ye husn-o-ishq ki baaten ye intizar ke gham

baham hain aaj ye mazi-o-haal-o-mustaqbil

mere shuur ki rau mein simaT gae jaise

mere siwa sabhi maujud hain mere nazdik

main sab ko dekhta rahta hun apni aankhon se

bas ek main hun jo KHud ko nazar nahin aata

ye mere hone na hone ki ibtida kya thi

ye mere hone na hone ki intiha kya hai

samajh mein kuchh nahin aata ki kis tarah se jiyun

falak pe ruh meri uD rahi hai sadiyon se

badan uThae hue hai abhi zamin ka bojh

mere thake hue kandhe pe kaun rakhta hai

kabhi guman ki gaThri kabhi yaqin ka bojh

mere wajud-o-adam ki ye jang to dekho

zara KHuda ki KHudai ka rang to dekho