nazm ittihad

fasl-e-bahār aa.ī magar ham haiñ aur ġham

har samt se haiñ ghere hue sadma-o-alam

aa.ī na uf zabāñ pe sitam par hue sitam

kyā imtihāñ ke vāste Thahre haiñ sirf ham

jab apnī quvvatoñ pe bharosā nahīñ rahā

behtar hai phir jahāñ se uThā le hameñ ḳhudā

is umr-e-chand-roza meñ kī laakh justujū

chhānī hai ham ne ḳhaak zamāne meñ kū-ba-kū

shikva adū kā kyā hai jab ahbāb haiñ adū

jiine kī ik second nahīñ ab to aarzū

ham ne samajh liyā ki jahāñ se guzar ga.e

jab dil hī mar gayā to sab armān mar ga.e

ham par girā.eñ charḳh ne is had pe bijliyāñ

dam-bhar meñ jal ke ḳhaak huiiñ saarī ustuḳhāñ

chaltī rahīñ havā-e-muḳhālif kī āñdhiyāñ

aatā nahīñ samajh meñ ki jā kar chhupeñ kahāñ

zer-e-zamīñ bhī chain kī ummīd ab nahīñ

phir kyā hai ye batā de koī gar ġhazab nahīñ

makr-o-fareb se jo kareñ zindagī basar

sau jaañ hazār dil se ho qurbān har bashar

din raat ham hoñ aur hoñ ahbāb-e-ḳhīra-sar

īmān-dāriyoñ meñ kaTī zindagī agar

har ek kī nigāh meñ bas ḳhaar ho ga.e

be-soñche-samjhe mustahiq-e-dār ho ga.e

da.avā to ye hai ham bhī musalmān haiñ zarūr

kalma jo pochhiye to nahīñ yaad hai huzūr

kyā ġham agar shikasta azīzoñ ke haiñ qubūr

terā ye is pe had se ziyāda hai kuchh ġhurūr

meloñ ke vāste jo talab ho to ḳhuub deñ

qaumī jo koī kaam ho to naam bhī na leñ

pūchhā agar ibādat-e-ḳhāliq hai koī chiiz

farmāyā dil meñ ye to nihāyat hai bad-tamīz

aiyyāshiyāñ jo kījiye to aap haiñ aziiz

ai qaum kāhilī hai tirī ghar kī ab kanīz

achchhī burī kā jab to nahīñ imtiyāz hai

be-mā.egī par apnī faqat tujh ko naaz hai

hushyār koī laakh kare to hai be-ḳhabar

is darja be-hayā ki nahīñ dil pe kuchh asar

nāzāñ haiñ sirf baap ke daadā ke naam par

qarze meñ ho rahī hai magar zindagī basar

dekho to ġhair hañste haiñ hoshyār ho zarā

lillāh ab to ḳhvāb se bedār ho zarā

phūlo-phalo ilāhī raho shaad sar-ba-sar

ho naḳhl-e-ittihād hamesha ye bārvar

vo din ḳhudā dikhā.e ki le aa.e ye samar

aanā hai tum ko manzil-e-maqsūd tak agar

Daalī hai ittihād kī tum ne jo dāġh-bel

himmat na haaro jaan ke bachchoñ kā ek khel

dekho to aur qaumoñ meñ kyā ittihād hai

daulat se aur ilm se har ek shaad hai

tum meñ bhī aaj aisā koī ḳhush-nihād hai

mahmūd kā ye qaul hameñ ab to yaad hai

do din rahe jo aa ke jahāñ meñ to khal ga.e

āḳhir ko misl-e-ḳhār-e-chaman se nikal ga.e

ai sakinān mauza-e-jugvūr assalām

duniyā hai aaj tum ko har ik baat kā payām

ab to nikālo apnī diloñ se ḳhayāl-e-ḳhām

achchhā nahīñ jo ġhair ke ban jaao tum ġhulām

achchhī nasīhatoñ pe amal phir zarūr hai

koī na ye kahe ki sarāsar qusūr hai

apne umuur meñ na karo ġhair ko sharīk

shar ko na DhūñDho aur karo ḳhair ko sharīk

achchhe nahīñ safar jo kareñ sair ko sharīk

ka.abe ke zikr meñ na karo dair ko sharīk

tum ḳhud rahe ho sāhib-e-iqbāl dahr meñ

kyuuñ DhūñDte ho zā.iqa-e-shahd zahar meñ

aḳhlāq kā charāġh bujhānā na chāhiye

zulmat-kada meñ ġhair ke jaanā na chāhiye

sachchī nasīhatoñ ko bhulānā na chāhiye

tum ko kisī fareb meñ aanā na chāhiye

allāh ke bharosa pe har kaam tum karo

dushman bhī jis ko maan leñ vo naam tum karo

fasl-e-bahaar aai magar hum hain aur gham

har samt se hain ghere hue sadma-o-alam

aai na uf zaban pe sitam par hue sitam

kya imtihan ke waste Thahre hain sirf hum

jab apni quwwaton pe bharosa nahin raha

behtar hai phir jahan se uTha le hamein KHuda

is umr-e-chand-roza mein ki lakh justuju

chhani hai hum ne KHak zamane mein ku-ba-ku

shikwa adu ka kya hai jab ahbab hain adu

jine ki ek second nahin ab to aarzu

hum ne samajh liya ki jahan se guzar gae

jab dil hi mar gaya to sab arman mar gae

hum par giraen charKH ne is had pe bijliyan

dam-bhar mein jal ke KHak huin sari ustuKHan

chalti rahin hawa-e-muKHalif ki aandhiyan

aata nahin samajh mein ki ja kar chhupen kahan

zer-e-zamin bhi chain ki ummid ab nahin

phir kya hai ye bata de koi gar ghazab nahin

makr-o-fareb se jo karen zindagi basar

sau jaan hazar dil se ho qurban har bashar

din raat hum hon aur hon ahbab-e-KHira-sar

iman-dariyon mein kaTi zindagi agar

har ek ki nigah mein bas KHar ho gae

be-sonche-samjhe mustahiq-e-dar ho gae

dawa to ye hai hum bhi musalman hain zarur

kalma jo pochhiye to nahin yaad hai huzur

kya gham agar shikasta azizon ke hain qubur

tera ye is pe had se ziyaada hai kuchh ghurur

melon ke waste jo talab ho to KHub den

qaumi jo koi kaam ho to nam bhi na len

puchha agar ibaadat-e-KHaliq hai koi chiz

farmaya dil mein ye to nihayat hai bad-tamiz

aiyyashiyan jo kijiye to aap hain aziz

ai qaum kahili hai teri ghar ki ab kaniz

achchhi buri ka jab to nahin imtiyaz hai

be-maegi par apni faqat tujh ko naz hai

hushyar koi lakh kare to hai be-KHabar

is darja be-haya ki nahin dil pe kuchh asar

nazan hain sirf bap ke dada ke nam par

qarze mein ho rahi hai magar zindagi basar

dekho to ghair hanste hain hoshyar ho zara

lillah ab to KHwab se bedar ho zara

phulo-phalo ilahi raho shad sar-ba-sar

ho naKHl-e-ittihad hamesha ye barwar

wo din KHuda dikhae ki le aae ye samar

aana hai tum ko manzil-e-maqsud tak agar

Dali hai ittihad ki tum ne jo dagh-bel

himmat na haaro jaan ke bachchon ka ek khel

dekho to aur qaumon mein kya ittihad hai

daulat se aur ilm se har ek shad hai

tum mein bhi aaj aisa koi KHush-nihad hai

mahmud ka ye qaul hamein ab to yaad hai

do din rahe jo aa ke jahan mein to khal gae

aaKHir ko misl-e-KHar-e-chaman se nikal gae

ai sakinan mauza-e-jugwur assalam

duniya hai aaj tum ko har ek baat ka payam

ab to nikalo apni dilon se KHayal-e-KHam

achchha nahin jo ghair ke ban jao tum ghulam

achchhi nasihaton pe amal phir zarur hai

koi na ye kahe ki sarasar qusur hai

apne umur mein na karo ghair ko sharik

shar ko na DhunDho aur karo KHair ko sharik

achchhe nahin safar jo karen sair ko sharik

kabe ke zikr mein na karo dair ko sharik

tum KHud rahe ho sahib-e-iqbaal dahr mein

kyun DhunDte ho zaiqa-e-shahd zahar mein

aKHlaq ka charagh bujhana na chahiye

zulmat-kada mein ghair ke jaana na chahiye

sachchi nasihaton ko bhulana na chahiye

tum ko kisi fareb mein aana na chahiye

allah ke bharosa pe har kaam tum karo

dushman bhi jis ko man len wo nam tum karo