nazm

jab vo is duniyā ke shor aur ḳhāmoshī se

qat’-e-ta'alluq ho ke english meñ ġhussa kartī hai

maiñ to Dar jaatā huuñ lekin

kamre kī dīvāreñ hañsne lagtī haiñ

vo ik aisī aag hai jis ko sirf dahakne se matlab hai

vo ik aisā phuul hai jis par apnī ḳhushbū bojh banī hai

vo ik aisā ḳhvāb hai jis ko dekhne vaalā ḳhud mushkil meñ paḌ saktā hai

us ko chhūne kī ḳhvāhish to Thiik hai lekin

paanī kaun pakaḌ saktā hai

vo rangoñ se vāqif hai

balki har ik rang ke shajre tak se vāqif hai

us ko 'ilm hai kin ḳhvāboñ se āñkheñ niilī paḌ jaatī haiñ

ham ne jin ko nafrat se mansūb kiyā

vo un piile phūloñ kī 'izzat kartī hai

kabhī kabhī vo apne haath meñ pencil le kar aisī satreñ khīñchtī hai

sab kuchh sīdhā ho jaatā hai

vo chāhe to har ik chiiz ko us ke asl meñ lā saktī hai

sirf usī ke hāthoñ se duniyā tartīb meñ aa saktī hai

har patthar us paaoñ se Takrāne kī ḳhvāhish meñ zinda hai

lekin ye to usī adhūre-pan kā jahāñ hai

har piñjre meñ aise qaidī kab hote haiñ

har kapḌe kī qismat meñ vo jism kahāñ hai

merī be-maqsad bātoñ se tang bhī aa jaatī hai to

mahsūs nahīñ hone detī

lekin apne hone se uktā jaatī hai

us ko vaqt kī pābandī se kyā matlab hai

vo to band ghaḌī bhī haath meñ bāñdh ke college aa jaatī hai

jab wo is duniya ke shor aur KHamoshi se

qat’-e-ta'alluq ho ke english mein ghussa karti hai

main to Dar jata hun lekin

kamre ki diwaren hansne lagti hain

wo ek aisi aag hai jis ko sirf dahakne se matlab hai

wo ek aisa phul hai jis par apni KHushbu bojh bani hai

wo ek aisa KHwab hai jis ko dekhne wala KHud mushkil mein paD sakta hai

us ko chhune ki KHwahish to Thik hai lekin

pani kaun pakaD sakta hai

wo rangon se waqif hai

balki har ek rang ke shajre tak se waqif hai

us ko 'ilm hai kin KHwabon se aankhen nili paD jati hain

hum ne jin ko nafrat se mansub kiya

wo un pile phulon ki 'izzat karti hai

kabhi kabhi wo apne hath mein pencil le kar aisi satren khinchti hai

sab kuchh sidha ho jata hai

wo chahe to har ek chiz ko us ke asl mein la sakti hai

sirf usi ke hathon se duniya tartib mein aa sakti hai

har patthar us paon se Takrane ki KHwahish mein zinda hai

lekin ye to usi adhure-pan ka jahan hai

har pinjre mein aise qaidi kab hote hain

har kapDe ki qismat mein wo jism kahan hai

meri be-maqsad baaton se tang bhi aa jati hai to

mahsus nahin hone deti

lekin apne hone se ukta jati hai

us ko waqt ki pabandi se kya matlab hai

wo to band ghaDi bhi hath mein bandh ke college aa jati hai