nazm

kisī tīkhe musavvir kā hasīñ shāhkār thī vo

us ke ḳhadd-o-ḳhāl aise the

ki jaise āsmāñ ke tasht pe rakkhe hue taare

magar vo isti.āre khul nahīñ sakte kisī sūrat

vo hoñToñ par hamesha muskurāhaT kā hasīñ ik taaj rakhtī thī

kabhī khultā nahīñ thā jo vo aisā raaz rakhtī thī

bahut maġhrūr thī lekin hamārī chāhatoñ kī laaj rakhtī thī

ajab andāz rakhtī thī

vo sharmātī to chehre par ajab ik rang aa jaatā

vo chaltī to ġhazāloñ ko bhī chalne kā zarā sā Dhang aa jaatā

vo jis dam gungunātī thī to ye mahsūs hotā thā

kisī mandir kī saarī ghanTiyāñ bajtī hoñ haule se

vo aisī jal-parī thī

ham ne jis ke sāmne har apsarā ko maañd dekhā thā

kabhī ham ne bhī apne rū-ba-rū ik chāñd dekhā thā

kisi tikhe musawwir ka hasin shahkar thi wo

us ke KHadd-o-KHal aise the

ki jaise aasman ke tasht pe rakkhe hue tare

magar wo istiare khul nahin sakte kisi surat

wo honTon par hamesha muskurahaT ka hasin ek taj rakhti thi

kabhi khulta nahin tha jo wo aisa raaz rakhti thi

bahut maghrur thi lekin hamari chahaton ki laj rakhti thi

ajab andaz rakhti thi

wo sharmati to chehre par ajab ek rang aa jata

wo chalti to ghazalon ko bhi chalne ka zara sa Dhang aa jata

wo jis dam gungunati thi to ye mahsus hota tha

kisi mandir ki sari ghanTiyan bajti hon haule se

wo aisi jal-pari thi

hum ne jis ke samne har apsara ko mand dekha tha

kabhi hum ne bhi apne ru-ba-ru ek chand dekha tha