nazm

hamāre sheroñ meñ maqtal ke isti.āre haiñ

hamāre ġhazloñ ne dekhā hai kūcha-e-qātil

salīb-o-dār pe nazmeñ hamārī laTkī haiñ

hamārī fikr hai zaḳhmī lahū-luhān hai fikr

har ek lafz pareshāñ har ek misra udaas

ham apne sheroñ ke mafhūm par pashemāñ haiñ

ḳhudā kare ki jo aa.eñ hamāre ba.ad vo log

hamāre fan kī alāmāt ko samajh na sakeñ

charāġh-e-dair-o-haram se kisī kā ghar na jale

na koī phir se hikāyāt-e-raftagāñ likkhe

na koī phir se alāmāt-e-ḳhūñ-chakāñ likkhe

fasīl-dār saroñ ke charāġh raqs-e-junūñ

sarāb-e-tishna-labī ḳhaar ābla-pā.ī

darīda-pairahanī chāk-dāmanī vahshat

sumūm, ātish-e-gul, barq, āshiyāñ, sayyād

rivāyateñ ye mire ahd kī alāmat haiñ

alāmateñ ye mire sher kā muqaddar haiñ

ḳhudā kare ki jo aa.eñ hamāre ba.ad vo log

hamāre fan kī alāmāt ko samajh na sakeñ

charāġh-e-dair-o-haram se kisī kā ghar na jale

na koī phir se hikāyāt-e-raftagāñ likkhe

na koī phir se alāmāt-e-ḳhūñ-chakāñ likkhe

hamare sheron mein maqtal ke istiare hain

hamare ghazlon ne dekha hai kucha-e-qatil

salib-o-dar pe nazmen hamari laTki hain

hamari fikr hai zaKHmi lahu-luhan hai fikr

har ek lafz pareshan har ek misra udas

hum apne sheron ke mafhum par pasheman hain

KHuda kare ki jo aaen hamare baad wo log

hamare fan ki alamat ko samajh na saken

charagh-e-dair-o-haram se kisi ka ghar na jale

na koi phir se hikayat-e-raftagan likkhe

na koi phir se alamat-e-KHun-chakan likkhe

fasil-dar saron ke charagh raqs-e-junun

sarab-e-tishna-labi KHar aabla-pai

darida-pairahani chaak-damani wahshat

sumum, aatish-e-gul, barq, aashiyan, sayyaad

riwayaten ye mere ahd ki alamat hain

alamaten ye mere sher ka muqaddar hain

KHuda kare ki jo aaen hamare baad wo log

hamare fan ki alamat ko samajh na saken

charagh-e-dair-o-haram se kisi ka ghar na jale

na koi phir se hikayat-e-raftagan likkhe

na koi phir se alamat-e-KHun-chakan likkhe