nazm

mere in kākul-e-barham kī hikāyat mat pūchh

aah us nāla-e-paiham kī haqīqat mat pūchh

dekh le chashm-e-basīrat se zamāne kā nizām

mujh se ai dost mire ġham kī sadāqat mat pūchh

lab-e-rañgīñ kā vo e.ajāz kahāñ se lā.ūñ

sāz-e-ḳhāmosh meñ āvāz kahāñ se lā.ūñ

dāstān-e-dil-e-barbād sunā.ūñ kaise

mujh pe guzrī hai jo uftād sunā.ūñ kaise

ātish-e-ġham se sulagtā hai kaleja merā

dil-e-nāshād kī fariyād sunā.ūñ kaise

haa.e ab tāqat-e-guftār kahāñ se lā.ūñ

naġhma-e-ġham kā ḳharīdār kahāñ se lā.ūñ

jām-o-mīnā meñ bahakte hue īmān ko dekh

bhūk-o-iflās se marte hue insān ko dekh

har taraf shor hai fariyād hai barbādī hai

rū-e-gardūñ pe machalte hue tūfāñ ko dekh

ab batā chashm-e-fusūñ-kār kahāñ se lā.ūñ

mast-o-be-ḳhud sī vo raftār kahāñ se lā.ūñ

par tujhe ishq-o-mohabbat se kahāñ fursat hai

mai-e-gul-rañg kī la.anat se kahāñ fursat hai

aah mazlūm nigāhoñ kā fasāna sun le

havas-o-hirs kī daulat se kahāñ fursat hai

dil-e-betāb meñ phir taab kahāñ se lā.ūñ

apnī āñkhoñ meñ mai-e-nāb kahāñ se lā.ūñ

apne gulshan kī tabāhī kā gila kis se karūñ

shām-e-ġhurbat kī siyāhī kā gila kis se karūñ

holiyāñ ḳhuun kī khelī ga.iiñ insānoñ meñ

apnī nā-karda-gunāhī kā gila kis se karūñ

apnī nīñdoñ meñ tire ḳhvāb kahāñ se lā.ūñ

fursat-e-ḳhātir-e-ahbāb kahāñ se lā.ūñ

mere in kakul-e-barham ki hikayat mat puchh

aah us nala-e-paiham ki haqiqat mat puchh

dekh le chashm-e-basirat se zamane ka nizam

mujh se ai dost mere gham ki sadaqat mat puchh

lab-e-rangin ka wo eajaz kahan se laun

saz-e-KHamosh mein aawaz kahan se laun

dastan-e-dil-e-barbaad sunaun kaise

mujh pe guzri hai jo uftad sunaun kaise

aatish-e-gham se sulagta hai kaleja mera

dil-e-nashad ki fariyaad sunaun kaise

hae ab taqat-e-guftar kahan se laun

naghma-e-gham ka KHaridar kahan se laun

jam-o-mina mein bahakte hue iman ko dekh

bhuk-o-iflas se marte hue insan ko dekh

har taraf shor hai fariyaad hai barbaadi hai

ru-e-gardun pe machalte hue tufan ko dekh

ab bata chashm-e-fusun-kar kahan se laun

mast-o-be-KHud si wo raftar kahan se laun

par tujhe ishq-o-mohabbat se kahan fursat hai

mai-e-gul-rang ki lanat se kahan fursat hai

aah mazlum nigahon ka fasana sun le

hawas-o-hirs ki daulat se kahan fursat hai

dil-e-betab mein phir tab kahan se laun

apni aankhon mein mai-e-nab kahan se laun

apne gulshan ki tabahi ka gila kis se karun

sham-e-ghurbat ki siyahi ka gila kis se karun

holiyan KHun ki kheli gain insanon mein

apni na-karda-gunahi ka gila kis se karun

apni nindon mein tere KHwab kahan se laun

fursat-e-KHatir-e-ahbab kahan se laun