nazm

mire shahar meñ mirī āḳhirī

vo ajiib shab thī visāl kī

ki chaman meñ chhāyā dhuāñ sā thā

kahāñ shabnamī vo bahār thī

vo chamelī ḳhushbū bikhertī

vo bharī sī shāḳheñ gulāb sī

ki har ek pattī thī nauha-ḳhvāñ

thī kalī kalī bhī niDhāl sī

the vo mujh se jaise gila-kunāñ

maiñ chalī huuñ kyoñ unheñ chhoḌ ke

thiiñ laraztī kāñptī Dāliyāñ

ki laboñ pe sab ke the marsiye

ye bayān karte the pairahan

hameñ ḳhud se tum na judā karo

tirī ḳhushbūoñ meñ base haiñ ham

hameñ apne saath hī le chalo

thā ajiib shor sā har taraf

ki samā.ateñ bhī laraz ga.iiñ

mirī siskiyāñ mirī aaheñ bhī

mire dil meñ ḳhauf se jā chhupīñ

na samay rukā na maiñ ruk sakī

ki vatan hī mujh se bichhaḌ gayā

vahī miTTī jis kā ḳhamīr thī

vahī shahar mujh se bichhaḌ gayā

mere shahar mein meri aaKHiri

wo ajib shab thi visal ki

ki chaman mein chhaya dhuan sa tha

kahan shabnami wo bahaar thi

wo chameli KHushbu bikherti

wo bhari si shaKHen gulab si

ki har ek patti thi nauha-KHwan

thi kali kali bhi niDhaal si

the wo mujh se jaise gila-kunan

main chali hun kyon unhen chhoD ke

thin larazti kanpti Daliyan

ki labon pe sab ke the marsiye

ye bayan karte the pairahan

hamein KHud se tum na juda karo

teri KHushbuon mein base hain hum

hamein apne sath hi le chalo

tha ajib shor sa har taraf

ki samaaten bhi laraz gain

meri siskiyan meri aahen bhi

mere dil mein KHauf se ja chhupin

na samay ruka na main ruk saki

ki watan hi mujh se bichhaD gaya

wahi miTTi jis ka KHamir thi

wahi shahar mujh se bichhaD gaya