nazm

na pūchho kis jahān-e-rang-o-bū se ho ke aa.e haiñ

jahāñ dil se matā-e-be-bahā ham kho ke aa.e haiñ

qayāmat thā nazāra us gulistān-e-mohabbat kā

nam-e-ruḳhsār-e-gul se chashm-e-tar ham dho ke aa.e haiñ

ḳhudā us ḳhitta-e-gulzār ko phūlā phalā rakhe

jahāñ ham nau-ba-nau tuḳhm-e-mohabbat bo ke aa.e haiñ

mohabbat karne vāloñ kī mohabbat se bahut kam thā

dam-e-ruḳhsat ham un ke aage jitnā ro ke aa.e haiñ

hamārī ḳhvāb kī rangīniyoñ kā pūchhnā kyā thā

mohabbat kī fazā meñ farsh-e-gul par so ke aa.e haiñ

alā.uddīn se mil kar idhar lauTe haiñ ham jab se

sab ahl-e-dil ye kahte haiñ ki ham kuchh ho ke aa.e haiñ

'ziyā.ī' aur 'nayyar' ke sivā aur naam bhī hoñge

mohabbat ke sahīfoñ meñ faqat in do ke aa.e haiñ

Thaharte hī Thaharte ye dil-e-betāb Thahregā

abhī kai din hue jab ham karachi ho ke aa.e haiñ

na puchho kis jahan-e-rang-o-bu se ho ke aae hain

jahan dil se mata-e-be-baha hum kho ke aae hain

qayamat tha nazara us gulistan-e-mohabbat ka

nam-e-ruKHsar-e-gul se chashm-e-tar hum dho ke aae hain

KHuda us KHitta-e-gulzar ko phula phala rakhe

jahan hum nau-ba-nau tuKHm-e-mohabbat bo ke aae hain

mohabbat karne walon ki mohabbat se bahut kam tha

dam-e-ruKHsat hum un ke aage jitna ro ke aae hain

hamari KHwab ki ranginiyon ka puchhna kya tha

mohabbat ki faza mein farsh-e-gul par so ke aae hain

alauddin se mil kar idhar lauTe hain hum jab se

sab ahl-e-dil ye kahte hain ki hum kuchh ho ke aae hain

'ziyai' aur 'nayyar' ke siwa aur nam bhi honge

mohabbat ke sahifon mein faqat in do ke aae hain

Thaharte hi Thaharte ye dil-e-betab Thahrega

abhi kai din hue jab hum karachi ho ke aae hain