nazm

navāh-e-jāñ meñ ek shab

vo 'ajab ḳhvāb kī sā'at thī

'ajab rang kī raat

chāñd ne jab suḳhan āġhāz kiyā thā ham se

terī mānūs sī ḳhushbū se havā thī labrez

lams-e-avval kī sunahrī tahrīr

tere aur mere subuk māthe par

jab bashārat kī tarah likkhī ga.ī

ik isī shab ke liye

paaT kar vaqt ke dariyā ko

baḌī duur se aa.ī thī maiñ

āyat-e-hijr huī thī mansūḳh

ik isī shab ke liye

ham ne ik 'umr kisī duur ke sayyāre par

sūra-e-'ishq tilāvat kī thī

tū bhī aayā thā pahan kar na.ī poshāk-e-badan

dil kī zebā.ī pe kuchh maiñ ne bhī mehnat kī thī

baaġh meñ hañste hue zard charāġh

shāḳh par khilte hue surḳh gulāb

chashm-e-hairāñ meñ damakte hue ḳhvāb

sab pazīrā.ī ko betāb hue jaate the

rāste qurb kī hiddat se ghule jaate the

jism par vasl-e-abad-tāb kī shīrīñ dastak

ruuh kā nuqra.ī dar kholtī thī

terī āvāz bahut paas aa kar

merā sāmān-e-safar kholtī thī

jumbish-e-chashm pe terī vo dhḌaknā dil kā

ek mauhūm ishāre pe sañbhalnā dil kā

yaad kī jhiil meñ har aan utartī huī raat

dil se guzrī hī nahīñ phir vo pighaltī huī raat

hoñT jab naav bane aur kināra sā badan

shab tirī yaad meñ larzāñ thā sitāra sā badan

nawah-e-jaan mein ek shab

wo 'ajab KHwab ki sa'at thi

'ajab rang ki raat

chand ne jab suKHan aaghaz kiya tha hum se

teri manus si KHushbu se hawa thi labrez

lams-e-awwal ki sunahri tahrir

tere aur mere subuk mathe par

jab bashaarat ki tarah likkhi gai

ek isi shab ke liye

paT kar waqt ke dariya ko

baDi dur se aai thi main

aayat-e-hijr hui thi mansuKH

ek isi shab ke liye

hum ne ek 'umr kisi dur ke sayyare par

sura-e-'ishq tilawat ki thi

tu bhi aaya tha pahan kar nai poshak-e-badan

dil ki zebai pe kuchh main ne bhi mehnat ki thi

bagh mein hanste hue zard charagh

shaKH par khilte hue surKH gulab

chashm-e-hairan mein damakte hue KHwab

sab pazirai ko betab hue jate the

raste qurb ki hiddat se ghule jate the

jism par wasl-e-abad-tab ki shirin dastak

ruh ka nuqrai dar kholti thi

teri aawaz bahut pas aa kar

mera saman-e-safar kholti thi

jumbish-e-chashm pe teri wo dhDakna dil ka

ek mauhum ishaare pe sanbhalna dil ka

yaad ki jhil mein har aan utarti hui raat

dil se guzri hi nahin phir wo pighalti hui raat

honT jab naw bane aur kinara sa badan

shab teri yaad mein larzan tha sitara sa badan