nazm

pahle to des bhārat amn-o-amāñ kā ghar thā

rahte the sab ikaTThe koī na ḳhauf Dar thā

kyā ho gayā hai ab ye jhagḌe kī hai samā.ī

kuchh bhuul ho ga.ī hai sadā apnī hī gañvā.ī

apne hī bhā.iyoñ par aafat jo Dhā rahī haiñ

aapas meñ phuuT kar ke izzat gañvā rahī haiñ

amn-o-amāñ kī duniyā barbād kar rahe haiñ

nāhaq-o-nāravā hī fariyād kar rahe haiñ

suntā hai kaun apnī ham kis ko ye sunā.eñ

ye bhuul hai sarāsar kis tarah ye batā.eñ

vahdat ke falsafa ko ham ne miTā diyā hai

duniyā hai chand roza ye bhī bhulā diyā hai

kuchh yaad bhī haiñ tum ko ek bramhā ke ma.anī

hai lā-sharīk vāhid parvardigār ya.anī

saare jahāñ meñ hastī us kī zuhūr us kā

āñkhoñ meñ nuur us kā dil meñ surūr us kā

kasrat kī ek-sānī vahdat kā hai namūna

har zarra se ayaañ hai ulfat kā ye namūna

ahl-e-vatan se apnī ab iltijā yahī hai

baaz aa.eñ jhūTī zid se bas mudda.ā yahī hai

pahle to des bhaarat amn-o-aman ka ghar tha

rahte the sab ikaTThe koi na KHauf Dar tha

kya ho gaya hai ab ye jhagDe ki hai samai

kuchh bhul ho gai hai sada apni hi ganwai

apne hi bhaiyon par aafat jo Dha rahi hain

aapas mein phuT kar ke izzat ganwa rahi hain

amn-o-aman ki duniya barbaad kar rahe hain

nahaq-o-narawa hi fariyaad kar rahe hain

sunta hai kaun apni hum kis ko ye sunaen

ye bhul hai sarasar kis tarah ye bataen

wahdat ke falsafa ko hum ne miTa diya hai

duniya hai chand roza ye bhi bhula diya hai

kuchh yaad bhi hain tum ko ek bramha ke mani

hai la-sharik wahid parwardigar yani

sare jahan mein hasti us ki zuhur us ka

aankhon mein nur us ka dil mein surur us ka

kasrat ki ek-sani wahdat ka hai namuna

har zarra se ayan hai ulfat ka ye namuna

ahl-e-watan se apni ab iltija yahi hai

baz aaen jhuTi zid se bas muddaa yahi hai