nazm

koī saḳht phal kāTte hue

us ne apne ḳhvāb meñ

apnī uñglī kaaT lī

jism se alāhida ho jaane vaalī uñglī ne

ret par lakīreñ banānā shurūa kar diiñ

kuchh adhūre nuqūsh ubhāre

phir vo ek laḳht bhaḌak uThī

sabz surḳh aur dūdhiyā raushnī nikālne ke baad

ye uñglī raakh meñ tabdīl ho ga.ī

raakh se phūTne lagā

ek nanhā sā paudā

us kī nāzuk pattiyoñ par yuuñ gumān hotā thā

goyā shāḳhoñ se nāzuk nāzuk sī uñgliyāñ nikal rahī hoñ

ye sab kuchh mahz ek ḳhvāb thā

ḳhvāb se jāgne ke baad

vo sanjīdgī se us ḳhvāb ke baare meñ sochtā rahā

phir hañs diyā

us ne apnī hathelī thapthapā.ī

Thiik us jagah

jahāñ us kī uñglī ḳhvāb meñ alāhida ho ga.ī thī

vahāñ uñglī hī na thī

us kā saarā badan dhuñdlāne lagā

saath hī

us paude ke nuqūsh vāzeh hone lage

jis kī nāzuk shāḳhoñ meñ

nāzuk nāzuk uñgliyāñ nikal rahī thiiñ

koi saKHt phal kaTte hue

us ne apne KHwab mein

apni ungli kaT li

jism se alahida ho jaane wali ungli ne

ret par lakiren banana shurua kar din

kuchh adhure nuqush ubhaare

phir wo ek laKHt bhaDak uThi

sabz surKH aur dudhiya raushni nikalne ke baad

ye ungli rakh mein tabdil ho gai

rakh se phuTne laga

ek nanha sa pauda

us ki nazuk pattiyon par yun guman hota tha

goya shaKHon se nazuk nazuk si ungliyan nikal rahi hon

ye sab kuchh mahz ek KHwab tha

KHwab se jagne ke baad

wo sanjidgi se us KHwab ke bare mein sochta raha

phir hans diya

us ne apni hatheli thapthapai

Thik us jagah

jahan us ki ungli KHwab mein alahida ho gai thi

wahan ungli hi na thi

us ka sara badan dhundlane laga

sath hi

us paude ke nuqush wazeh hone lage

jis ki nazuk shaKHon mein

nazuk nazuk ungliyan nikal rahi thin