nazm

sard havā darvāze par dastak detī hai

aur chaap kahīñ duur

dil ke andar ubharne lagtī hai

dhund meñ Duube shahr kī

vīrān saḌkoñ par

yādoñ ke hayūle

mire saath chahal-qadmī karte haiñ

Tuut jaane vaale

rābtoñ aur sūkhe gilāsoñ

meñ koī dukh to mushtarak rahā hogā

jo palkoñ aur hoñToñ ke biich jhūltā rahtā hai

dīvār-gīr ghaḌī meñ Thahre vaqt

saiñkaḌoñ kitāboñ

be-tahāshā kapḌoñ

aur

anginat jūtoñ meñ baTe vajūd ko

tartīb dete

sāñseñ ukhaḌtī haiñ

to sub.h kā alarm

be-tartīb ḳhvāboñ ke biich

musalsal shor karne lagtā hai

rāt-bhar jaage huoñ

ke liye baal banā kar

na.ī sub.h kā āġhāz

kitnā mushkil hotā hai

is kā andāza

ḳhudā

aur

Time-Table incharge

donoñ hī nahīñ lagā paate

aur dohrāne ke liye

hameñ phir se

pichhlā din sauñp dete haiñ

sard hawa darwaze par dastak deti hai

aur chap kahin dur

dil ke andar ubharne lagti hai

dhund mein Dube shahr ki

viran saDkon par

yaadon ke hayule

mere sath chahal-qadmi karte hain

Tut jaane wale

rabton aur sukhe gilason

mein koi dukh to mushtarak raha hoga

jo palkon aur honTon ke bich jhulta rahta hai

diwar-gir ghaDi mein Thahre waqt

sainkaDon kitabon

be-tahasha kapDon

aur

anginat juton mein baTe wajud ko

tartib dete

sansen ukhaDti hain

to subh ka alarm

be-tartib KHwabon ke bich

musalsal shor karne lagta hai

raat-bhar jage huon

ke liye baal bana kar

nai subh ka aaghaz

kitna mushkil hota hai

is ka andaza

KHuda

aur

Time-Table incharge

donon hi nahin laga pate

aur dohrane ke liye

hamein phir se

pichhla din saunp dete hain