nazm

Tapak rahā hai lahū sar pe āsmānoñ kā

jabīñ pe vaqt ke panjoñ kī kuchh ḳharāsheñ haiñ

jamī huī hai laboñ par sukūt kī papḌī

dhadhak rahī hai ajab sī ik aag āñkhoñ meñ

dabe haiñ sīna-e-jāñ meñ ujaaḌ sannāTe

dayār-e-dil meñ sisakte haiñ be-sadā raste

jhuke hue mere shānoñ pe bojh hai ġham kā

maiñ Dho rahā huuñ kamar pe sitam ke mashkīze

shikam kī aag bhaḌaktī hai barq kī mānind

ragoñ meñ ḳhuun kī gardish hai yā qayāmat hai

havā ne khol diye band-e-pairahan saare

phisal ke gir ga.ī zaanū se ishq kī chādar

vo jis nasīb ne baḳhshī thī shohratoñ kī amaañ

usī nasīb ko ghuTnoñ pe le ke baiThā huuñ

maiñ apne paañv ke chhāloñ ko kis tarah dekhūñ

sakat nahīñ hai mujhe beḌiyāñ uThāne kī

koī charāġh-e-ta'alluq bhī ab nahīñ baaqī

maiñ ḳhāl-o-ḳhad ke añdheroñ meñ qaid huuñ kab se

khaḌī hai duur kahīñ jā ke merī bīnā.ī

utar rahā hai badan par azāb-e-tanhā.ī

Tapak raha hai lahu sar pe aasmanon ka

jabin pe waqt ke panjon ki kuchh KHarashen hain

jami hui hai labon par sukut ki papDi

dhadhak rahi hai ajab si ek aag aankhon mein

dabe hain sina-e-jaan mein ujaD sannaTe

dayar-e-dil mein sisakte hain be-sada raste

jhuke hue mere shanon pe bojh hai gham ka

main Dho raha hun kamar pe sitam ke mashkize

shikam ki aag bhaDakti hai barq ki manind

ragon mein KHun ki gardish hai ya qayamat hai

hawa ne khol diye band-e-pairahan sare

phisal ke gir gai zanu se ishq ki chadar

wo jis nasib ne baKHshi thi shohraton ki aman

usi nasib ko ghuTnon pe le ke baiTha hun

main apne panw ke chhaalon ko kis tarah dekhun

sakat nahin hai mujhe beDiyan uThane ki

koi charagh-e-ta'alluq bhi ab nahin baqi

main KHal-o-KHad ke andheron mein qaid hun kab se

khaDi hai dur kahin ja ke meri binai

utar raha hai badan par azab-e-tanhai