nazm

tire puure badan par ik muqaddas aag kā pahra hai

jo terī taraf baḌhte hue hāthoñ ke nāḳhun rok letā hai

tire hoñToñ se nikle saañs kī ḳhushbū

dar-o-dīvār se rasta banā kar saare barr-e-'āzamoñ meñ phail saktī hai

tirī bāñheñ abad ko jaane vaalī shāhrāheñ haiñ

tirī dā.īñ hathelī kī lakīreñ dūsrī duniyāoñ ke naqshe haiñ jo in munshiyoñ ke bas se bāhar haiñ

tirī āñkheñ nahīñ ye devtāoñ kī panah-gāheñ haiñ

jin meñ vaqt jaise zahr kā tiryāq hai

tirī zulfoñ kī vus'at is jahāñ kī intihāoñ se pare tak hai

tirī gardan kisī jannat ke pākīza daraḳhtoñ ke tane ko dekh kar tarshī ga.ī hai

hamāre jism par se terī parchhā.ī guzar jaa.e

to mumkin hai ki ham is maut jaise ḳhauf se āzād ho jaa.eñ

hamāre paas aisā kyā hai jo tujh ko batā kar ham tujhe qaa.il kareñ

bas itnā hai ki apne lafz barsā kar tirī chhatrī pe bārish pheñk deñge

yā tire chehre pe apnī nazm kī ik satr se chhāñv kareñge

dhuup de deñge

magar kyā fā.eda is kā ki mausam ḳhud tire jūtoñ ke tasmoñ se bañdhe haiñ

tire hamrāh chalne kī koī ḳhvāhish agar dil meñ kabhī thī bhī

to ham ne tark kar dī hai

ham is laa.iq nahīñ haiñ

hameñ mā'lūm hai ki agle vaqtoñ meñ ye log

tire pairoñ ke sāñchoñ se na.ī samtoñ ke andāze lagā.eñge

tere pure badan par ek muqaddas aag ka pahra hai

jo teri taraf baDhte hue hathon ke naKHun rok leta hai

tere honTon se nikle sans ki KHushbu

dar-o-diwar se rasta bana kar sare barr-e-'azamon mein phail sakti hai

teri banhen abad ko jaane wali shahrahen hain

teri dain hatheli ki lakiren dusri duniyaon ke naqshe hain jo in munshiyon ke bas se bahar hain

teri aankhen nahin ye dewtaon ki panah-gahen hain

jin mein waqt jaise zahr ka tiryaq hai

teri zulfon ki wus'at is jahan ki intihaon se pare tak hai

teri gardan kisi jannat ke pakiza daraKHton ke tane ko dekh kar tarshi gai hai

hamare jism par se teri parchhai guzar jae

to mumkin hai ki hum is maut jaise KHauf se aazad ho jaen

hamare pas aisa kya hai jo tujh ko bata kar hum tujhe qail karen

bas itna hai ki apne lafz barsa kar teri chhatri pe barish phenk denge

ya tere chehre pe apni nazm ki ek satr se chhanw karenge

dhup de denge

magar kya faeda is ka ki mausam KHud tere juton ke tasmon se bandhe hain

tere hamrah chalne ki koi KHwahish agar dil mein kabhi thi bhi

to hum ne tark kar di hai

hum is laiq nahin hain

hamein ma'lum hai ki agle waqton mein ye log

tere pairon ke sanchon se nai samton ke andaze lagaenge