nazm

tumheñ mujh se mohabbat ho

aur is darja mohabbat ho

ki mere bin tumhārī zindagānī dard ho jaa.e

zarā jo ro paḌūñ maiñ to

tumhāre qahqahoñ kā rang dhul kar zard ho jaa.e

tumheñ mujh se mohabbat ho

aur is had tak mohabbat ho

ki mere naam kī ḳhushbū tumhārī be-sukūñ nīñdoñ kā ghar ābād kartī ho

vo merī yaad kī chādar lipaT kar tum se tum ko

ziist ke be-zār-kun ma.amūl se āzād kartī ho

tumheñ mujh se mohabbat ho

aur is tarah mohabbat ho

tumhāre gird

tum ko har ghaḌī maiñ hī dikhā.ī duuñ

tumhārā aa.ina maiñ huuñ

tumhārā vaqt bhī maiñ huuñ

koī āvāz gūñje

saaz gūñje yā koī sargam

tumheñ har ik

navā-e-nau meñ

bas maiñ hī sunā.ī duuñ

tumheñ mujh se mohabbat ho

mohabbat hī mohabbat ho

ye kahnā chāhtī huuñ maiñ

magar phir ḳhauf aatā hai

ki gar jo pūchh baiThe tum

ki mujh ko bhī to tum se Thiik aisī hī mohabbat honī chāhiye na

mere dil ko bhī tum se be-tahāshā chāh-o-raġhbat honī chāhiye na

to is pe kyā kahūñgī maiñ

koī be-rabt sā jumla

koī uljhā huā fiqra

nahīñ kuchh bhī nahīñ is par

javāban chup rahūñgī maiñ

ki merī jaan kuchh jazbe

zabāñ kā saath chāhe bin

faqat bhīgī huī āñkhoñ se jhalkeñ to hī behtar hai

aur aañsū nā-rasā.ī ke

zamāne kī nazar se duur tanhā

añdherī raat kī bāñhoñ meñ chhalkeñ to hī behtar hai

tumhein mujh se mohabbat ho

aur is darja mohabbat ho

ki mere bin tumhaari zindagani dard ho jae

zara jo ro paDun main to

tumhaare qahqahon ka rang dhul kar zard ho jae

tumhein mujh se mohabbat ho

aur is had tak mohabbat ho

ki mere nam ki KHushbu tumhaari be-sukun nindon ka ghar aabaad karti ho

wo meri yaad ki chadar lipaT kar tum se tum ko

zist ke be-zar-kun mamul se aazad karti ho

tumhein mujh se mohabbat ho

aur is tarah mohabbat ho

tumhaare gird

tum ko har ghaDi main hi dikhai dun

tumhaara aaina main hun

tumhaara waqt bhi main hun

koi aawaz gunje

saz gunje ya koi sargam

tumhein har ek

nawa-e-nau mein

bas main hi sunai dun

tumhein mujh se mohabbat ho

mohabbat hi mohabbat ho

ye kahna chahti hun main

magar phir KHauf aata hai

ki gar jo puchh baiThe tum

ki mujh ko bhi to tum se Thik aisi hi mohabbat honi chahiye na

mere dil ko bhi tum se be-tahasha chah-o-raghbat honi chahiye na

to is pe kya kahungi main

koi be-rabt sa jumla

koi uljha hua fiqra

nahin kuchh bhi nahin is par

jawaban chup rahungi main

ki meri jaan kuchh jazbe

zaban ka sath chahe bin

faqat bhigi hui aankhon se jhalken to hi behtar hai

aur aansu na-rasai ke

zamane ki nazar se dur tanha

andheri raat ki banhon mein chhalken to hi behtar hai