nazm

tū kuchh bhī kah le magar mujh ko e.atibār nahīñ

ki dil ko mere kisī taur ab qarār nahīñ

uThā le tū bhale jhūTī hazār bhī qasmeñ

mujhe yaqīn hai ab tujh ko mujh se pyaar nahīñ

bajā ki tujh ko mohabbat thī mujh se ab to nahīñ

ye be-qarārī-e-dil merī be-sabab to nahīñ

jo aa rahe haiñ taġhayyur tumhārī zaat meñ vo

mire mizāj meñ aa jaa.eñ kuchh ajab to nahīñ

tirā kahā bhī chalo maan hī liyā lekin

ki maiñ ne vahm kiyā vahm hī kiyā lekin

nahīñ kiyā maiñ ne mahsūs merī ġhalatī hai

hai tū ne mujh se bahut pyaar hī kiyā lekin

hai jitnī baar tasallī ye dil ko dī maiñ ne

mirā ye dil ki kisī taur māntā hī nahīñ

bigaḌ gayā hai kisī tifl-e-nā-samajh kī tarah

kisī dalīl ko mantiq ko jāntā hī nahīñ

hai ek zid ki nahīñ jiinā ab nahīñ jiinā

zahr hayāt kā ab aur din nahīñ piinā

ab ehtijāj hai karnā bhale sazā hī mile

zabāñ ko zabt kī sozan se ab nahīñ siinā

tu kuchh bhi kah le magar mujh ko eatibar nahin

ki dil ko mere kisi taur ab qarar nahin

uTha le tu bhale jhuTi hazar bhi qasmen

mujhe yaqin hai ab tujh ko mujh se pyar nahin

baja ki tujh ko mohabbat thi mujh se ab to nahin

ye be-qarari-e-dil meri be-sabab to nahin

jo aa rahe hain taghayyur tumhaari zat mein wo

mere mizaj mein aa jaen kuchh ajab to nahin

tera kaha bhi chalo man hi liya lekin

ki main ne wahm kiya wahm hi kiya lekin

nahin kiya main ne mahsus meri ghalati hai

hai tu ne mujh se bahut pyar hi kiya lekin

hai jitni bar tasalli ye dil ko di main ne

mera ye dil ki kisi taur manta hi nahin

bigaD gaya hai kisi tifl-e-na-samajh ki tarah

kisi dalil ko mantiq ko jaanta hi nahin

hai ek zid ki nahin jina ab nahin jina

zahr hayat ka ab aur din nahin pina

ab ehtijaj hai karna bhale saza hi mile

zaban ko zabt ki sozan se ab nahin sina