nazm

vāhimoñ kī kokh se paidā hue

kuchh aqīdoñ aur purāne maz.haboñ ke silsile

sub.h-dam sūraj kahāñ se aa.e hai

shaam hote hī kahāñ chhup jaa.e hai

aur shab par aa.e hai kaise shabāb

āsmāñ meñ kaise āvezāñ hai qurs-e-māhtāb

tīra-rātoñ meñ kahāñ kho jaa.e hai

kis tarah aatī hai barkhā kī bahār

kis tarah girte haiñ gaale barf ke

aadmī anjān thā hairān thā

aur ye sharmīle raaz

jo azal se haiñ diloñ meñ jāguzīñ

kis tarah paidā hue

raaz be-ḳhabarī surūr

in se maz.hab kā huā āhista āhista zuhūr

chār-sū thī gumrahī hī gumrahī

dil-nashīñ sangīt meñ lipTī rahī kam-āgahī

kis ne sochā thā ḳhudā kā hai vajūd

voltaire ne kahā

is zamīñ par pahlā shātir pahle ahmaq se milā to

mā’rifat paidā huī

band ho kar rah ga.ī thī phir diloñ kī bhī zabāñ

ruk gayā thā aarzū kā kārvāñ

'aql ke vo jhilmilāte silsile

ab kahīñ bhī dahr meñ shāyad na the

dard-e-dil pairoñ tale rauñdā gayā

garm thī itnī zamāne kī havā

ruuh ne phir ruuh ko hairāñ kiyā

ātishīñ jazbāt bhaḌkā.e ga.e

aaj tak oḌhe hue haiñ ham zamīroñ ke kafan

nāchtā hai sar pe maz.hab kā junūñ

ḳhūn-ālūda hai har ik pairahan

silsila-dar-silsila tārīkiyāñ baḌhtī ga.iiñ

raushnī afkār kī maddham huī

vo jo ik hasrat javāñ thī ek dilkash sī ravānī kī tarah

āḳhirash thak haar kar so hī ga.ī

ab zarūrat hai zamāne kī yahī

gungunā.e kuchh fazā meñ ek dilbar āgahī

haañ agar tū hai to ai rabb-e-karīm

soch ho dil meñ muqīm

phir na maz.hab zehn par chhā.e kabhī

khoTā sikka phir na chal paa.e kabhī

ho yaqīnan rūnumā

jhanjhanā.e āgahī

ādamiyyat kā nirālā silsila

soch kī bālīdgī se ḳhush-adā ho zindagī

ḳhushnumā ho zindagī

wahimon ki kokh se paida hue

kuchh aqidon aur purane mazhabon ke silsile

subh-dam suraj kahan se aae hai

sham hote hi kahan chhup jae hai

aur shab par aae hai kaise shabab

aasman mein kaise aawezan hai qurs-e-mahtab

tira-raaton mein kahan kho jae hai

kis tarah aati hai barkha ki bahaar

kis tarah girte hain gale barf ke

aadmi anjaan tha hairan tha

aur ye sharmile raaz

jo azal se hain dilon mein jaguzin

kis tarah paida hue

raaz be-KHabari surur

in se mazhab ka hua aahista aahista zuhur

chaar-su thi gumrahi hi gumrahi

dil-nashin sangit mein lipTi rahi kam-agahi

kis ne socha tha KHuda ka hai wajud

woltaire ne kaha

is zamin par pahla shatir pahle ahmaq se mila to

ma’rifat paida hui

band ho kar rah gai thi phir dilon ki bhi zaban

ruk gaya tha aarzu ka karwan

'aql ke wo jhilmilate silsile

ab kahin bhi dahr mein shayad na the

dard-e-dil pairon tale raunda gaya

garm thi itni zamane ki hawa

ruh ne phir ruh ko hairan kiya

aatishin jazbaat bhaDkae gae

aaj tak oDhe hue hain hum zamiron ke kafan

nachta hai sar pe mazhab ka junun

KHun-aluda hai har ek pairahan

silsila-dar-silsila tarikiyan baDhti gain

raushni afkar ki maddham hui

wo jo ek hasrat jawan thi ek dilkash si rawani ki tarah

aaKHirash thak haar kar so hi gai

ab zarurat hai zamane ki yahi

gungunae kuchh faza mein ek dilbar aagahi

han agar tu hai to ai rabb-e-karim

soch ho dil mein muqim

phir na mazhab zehn par chhae kabhi

khoTa sikka phir na chal pae kabhi

ho yaqinan runuma

jhanjhanae aagahi

aadamiyyat ka nirala silsila

soch ki baalidgi se KHush-ada ho zindagi

KHushnuma ho zindagi