nazm

shā.erī

ek mo.ajaza hai

jo zaḳhmoñ ko

phūloñ meñ tabdīl kar detī hai

shāyad maiñ ne ġhalat kahā

kyūñki ye phuul

koī vāzeh shakl iḳhtiyār nahīñ kar paate

in kā koī rañg nahīñ hotā

in se koī ḳhushbū nahīñ nikaltī

in ko nazmoñ kī kitāb meñ nahīñ rakkhā jā saktā

mahbūba ko nahīñ diyā jā saktā

dostoñ ko nahīñ bhejā jā saktā

town-hall meñ in kī numā.ish nahīñ kī jā saktī

koī bank har roz

in kī qīmat-e-ḳharīd yā qīmat-e-faroḳht jaarī nahīñ kartā

har qism ke jazbe se aarī ye phuul

insānī tārīḳh meñ koī numāyāñ maqām

hāsil nahīñ kar pā.eñge

koī inheñ ḳhvāboñ meñ nahīñ dekhegā

ye kisī saḌak ke kināre nahīñ kheleñge

inheñ koī kashtī meñ bhar ke nahīñ le jā.egā

baġhair kisī mausam ke phūTne vaale ye phuul

shā.erī kā mo.ajaza haiñ

aag miTTī havā aur paanī kī shāyad inheñ zarūrat hī nahīñ paḌtī

ye insān kī āvāz ke saath nashv-o-numā paate haiñ

insān kī ḳhāmoshī meñ hamesha zinda rahte haiñ

insānī lams se jilā paane vaale ye shāhkār

insān kī tarah fanā nahīñ kiye jā sakte

hathiyāroñ kī madad se muta.assir nahīñ kiye jā sakte

shā.erī ek mo.ajaza hai

jo zaḳhmoñ ko phūloñ meñ

yā kisī bhī chiiz ko kisī chiiz meñ badal saktā hai

zinda rakh saktā hai

shaeri

ek moajaza hai

jo zaKHmon ko

phulon mein tabdil kar deti hai

shayad main ne ghalat kaha

kyunki ye phul

koi wazeh shakl iKHtiyar nahin kar pate

in ka koi rang nahin hota

in se koi KHushbu nahin nikalti

in ko nazmon ki kitab mein nahin rakkha ja sakta

mahbuba ko nahin diya ja sakta

doston ko nahin bheja ja sakta

town-hall mein in ki numaish nahin ki ja sakti

koi bank har roz

in ki qimat-e-KHarid ya qimat-e-faroKHt jari nahin karta

har qism ke jazbe se aari ye phul

insani tariKH mein koi numayan maqam

hasil nahin kar paenge

koi inhen KHwabon mein nahin dekhega

ye kisi saDak ke kinare nahin khelenge

inhen koi kashti mein bhar ke nahin le jaega

baghair kisi mausam ke phuTne wale ye phul

shaeri ka moajaza hain

aag miTTi hawa aur pani ki shayad inhen zarurat hi nahin paDti

ye insan ki aawaz ke sath nashw-o-numa pate hain

insan ki KHamoshi mein hamesha zinda rahte hain

insani lams se jila pane wale ye shahkar

insan ki tarah fana nahin kiye ja sakte

hathiyaron ki madad se mutassir nahin kiye ja sakte

shaeri ek moajaza hai

jo zaKHmon ko phulon mein

ya kisi bhi chiz ko kisi chiz mein badal sakta hai

zinda rakh sakta hai