nazm

hameñ ek daraḳht ko

sar-buland karnā chāhiye

vo batri se chalne vaale

aare le kar, be-shumār mazdūr le kar

use kāTne aa.e haiñ

vo chaubīs pahiyoñ vaalā Truck le kar

use jañgal kī hudūd se bāhar le jaane aa.e haiñ

vo containeroñ se bharā jahāz le kar

is kī shāḳheñ, patte, tanā aur jaḌeñ

samundarī rāste se

apne headquarter tak le jaane aa.e haiñ

hameñ jis daraḳht ko sar-buland karnā hai

us kī havā, paanī aur zamīn chhīnī jā chukī hai

us ke parinde aur dhuup chhīnī jā chukī hai

us kā saaya aur ḳhvāb chhīne jā chuke haiñ

sirf mohabbat baaqī hai jis kī madad se

ham apne dil ko is kī zamīn

apnī āñkhoñ ko is kī jaḌeñ

aur apne bāzuoñ ko us kī shāḳheñ banā deñge

use sahārā deñge

aur hamesha sar-buland rakheñge

hamein ek daraKHt ko

sar-buland karna chahiye

wo batri se chalne wale

aare le kar, be-shumar mazdur le kar

use kaTne aae hain

wo chaubis pahiyon wala Truck le kar

use jangal ki hudud se bahar le jaane aae hain

wo containeron se bhara jahaz le kar

is ki shaKHen, patte, tana aur jaDen

samundari raste se

apne headquarter tak le jaane aae hain

hamein jis daraKHt ko sar-buland karna hai

us ki hawa, pani aur zamin chhini ja chuki hai

us ke parinde aur dhup chhini ja chuki hai

us ka saya aur KHwab chhine ja chuke hain

sirf mohabbat baqi hai jis ki madad se

hum apne dil ko is ki zamin

apni aankhon ko is ki jaDen

aur apne bazuon ko us ki shaKHen bana denge

use sahaara denge

aur hamesha sar-buland rakhenge