nazr-e-collage

ai sar-zamīn-e-pāk ke yārān-e-nek-nām

bā-sad ḳhulūs shā.ir-e-āvāra kā hai naam

ai vādī-e-jamīl mire dil kī dhaḌkaneñ

ādāb kah rahī haiñ tirī bārgāh meñ

tū aaj bhī hai mere liye jannat-e-ḳhayāl

haiñ tujh meñ dafn merī javānī ke chaar saal

kumlā.e haiñ yahāñ pe mirī zindagī ke phuul

in rāstoñ meñ dafn haiñ merī ḳhushī ke phuul

terī navāzishoñ ko bhulāyā na jā.egā

maazī kā naqsh dil se miTāyā na jā.egā

terī nashāt-ḳhez fazā-e-javāñ kī ḳhair

gul-hā-e-rañg-o-bū ke hasīñ kārvāñ kī ḳhair

daur-e-ḳhizāñ meñ bhī tirī kaliyāñ khilī raheñ

tā-hashr ye hasīn fazā.eñ basī raheñ

ham ek ḳhaar the jo chaman se nikal ga.e

nañg-e-vatan the hadd-e-vatan se nikal ga.e

gaa.e haiñ is fazā meñ vafāoñ ke raag bhī

naġhmāt-e-ātishīñ se bikherī hai aag bhī

sarkash bane haiñ giit baġhāvat ke gaa.e haiñ

barsoñ na.e nizām ke naqshe banā.e haiñ

naġhma nashāt-e-rūh kā gaayā hai bārhā

gītoñ meñ āñsuoñ ko chhupāyā hai bārhā

ma.asūmiyoñ ke jurm meñ badnām bhī hue

tere tufail morid-e-ilzām bhī hue

is sar zamīñ pe aaj ham ik baar hī sahī

duniyā hamāre naam se bezār hī sahī

lekin ham in fazāoñ ke paale hue to haiñ

giryāñ nahīñ to yaañ se nikāle hue to haiñ

ai sar-zamin-e-pak ke yaran-e-nek-nam

ba-sad KHulus shair-e-awara ka hai nam

ai wadi-e-jamil mere dil ki dhaDkanen

aadab kah rahi hain teri bargah mein

tu aaj bhi hai mere liye jannat-e-KHayal

hain tujh mein dafn meri jawani ke chaar sal

kumlae hain yahan pe meri zindagi ke phul

in raston mein dafn hain meri KHushi ke phul

teri nawazishon ko bhulaya na jaega

mazi ka naqsh dil se miTaya na jaega

teri nashat-KHez faza-e-jawan ki KHair

gul-ha-e-rang-o-bu ke hasin karwan ki KHair

daur-e-KHizan mein bhi teri kaliyan khili rahen

ta-hashr ye hasin fazaen basi rahen

hum ek KHar the jo chaman se nikal gae

nang-e-watan the hadd-e-watan se nikal gae

gae hain is faza mein wafaon ke rag bhi

naghmat-e-atishin se bikheri hai aag bhi

sarkash bane hain git baghawat ke gae hain

barson nae nizam ke naqshe banae hain

naghma nashat-e-ruh ka gaya hai barha

giton mein aansuon ko chhupaya hai barha

masumiyon ke jurm mein badnam bhi hue

tere tufail morid-e-ilzam bhi hue

is sar zamin pe aaj hum ek bar hi sahi

duniya hamare nam se bezar hi sahi

lekin hum in fazaon ke pale hue to hain

giryan nahin to yan se nikale hue to hain