nazr-e-iqbaal

ai mire āgahī ke payambar

maiñ tujhe kaun se harf kī nazr duuñ

harf banjar haiñ

jazboñ se sachchā.iyāñ chhin ga.iiñ

ḳhvāb uḌtī huī dhuul kī tarah

āñkhoñ meñ chubhte haiñ

goyā zabāñ ret kā ek tuudā

bayāñ saḳht pathrīle sāhil pe phailī huī

be-samar jhāḌiyāñ

apne be-faiz saa.e se ḳhud munjamid

fahm-o-idrāk-o-ehsās yuuñ be-asar

jaise maiñ ik khañDar

aur tū mujh meñ lafzoñ kā zinda shajar

apnī pur-pech bāñhoñ se sāya-fagan

aur maiñ be-ḳhabar

mere zinda shajar

tere saa.e meñ ā.indagāñ kī mahak

terī sarsar meñ bhī raftagāñ kī garaj

tere phal-phūl dahkī huī āgahī

āgahī se numū aur numū se ḳhudī

munjamid mausamoñ meñ hamāre liye

raushnī kī ḳhabar

mere zinda shajar

mere zinda shajar

ai mere aagahi ke payambar

main tujhe kaun se harf ki nazr dun

harf banjar hain

jazbon se sachchaiyan chhin gain

KHwab uDti hui dhul ki tarah

aankhon mein chubhte hain

goya zaban ret ka ek tuda

bayan saKHt pathrile sahil pe phaili hui

be-samar jhaDiyan

apne be-faiz sae se KHud munjamid

fahm-o-idrak-o-ehsas yun be-asar

jaise main ek khanDar

aur tu mujh mein lafzon ka zinda shajar

apni pur-pech banhon se saya-fagan

aur main be-KHabar

mere zinda shajar

tere sae mein aaindagan ki mahak

teri sarsar mein bhi raftagan ki garaj

tere phal-phul dahki hui aagahi

aagahi se numu aur numu se KHudi

munjamid mausamon mein hamare liye

raushni ki KHabar

mere zinda shajar

mere zinda shajar