nazr-e-iqbaal

vo ik mufakkir-e-azīm shā.ir

thā vo iqbāl shā.iroñ kā

vo zindagānī kā rāz-dāñ

vo kāmrānī kā naġhma-ḳhvāñ

maqbūl thā hind-o-pāk meñ vo yaksāñ

tarāna-e-hind kā vo ḳhāliq

vo falsafī thā vo rahnumā thā

diyā falsafa jis ne ḳhudī-o-be-ḳhudī kā

tamām duniyā ke nazm-hā-e-siyāsat

tamām duniyā ke nuqta-hā-e-nazar

the us kī chashm-e-bīnā meñ raushan

thā magar vo āshiq-e-asia

harīf thā ahl-e-maġhrib kā vo

ḳhitāb jis ko diyā thā qaum ne us kī

vahī thā shā.ir-e-mashriq

thā vo muballiġh islām kā be-shak

ki islām hai amn-o-rāhat kā maz.hab

vo thā ik mard-e-kāmil insāñ mukammal

garche thā barahman-zāda kashmīr kā

nazar meñ us kī thā devtā sā

vatan kī miTTī kā har ek zarra

ḳhirad thī us kī nigāh meñ hech-o-past

junūn-e-ishq kā thā vo dil se qaa.il

vo thā ik paiġhambar ilm-o-amal kā

thī na mahdūd shā.erī us kī

na thā mahdūd dā.era us ke paiġhām kā

the muḳhātab us ke saarī duniyā ke ām-o-ḳhās

kisānoñ mazdūroñ kā thā vo haamī

kah gayā vo apne sher meñ

jis khet se dahqāñ ko mayassar na ho rozī

us khet ke har ḳhosha-e-gandum ko jalā do

wo ek mufakkir-e-azim shair

tha wo iqbaal shairon ka

wo zindagani ka raaz-dan

wo kaamrani ka naghma-KHwan

maqbul tha hind-o-pak mein wo yaksan

tarana-e-hind ka wo KHaliq

wo falsafi tha wo rahnuma tha

diya falsafa jis ne KHudi-o-be-KHudi ka

tamam duniya ke nazm-ha-e-siyasat

tamam duniya ke nuqta-ha-e-nazar

the us ki chashm-e-bina mein raushan

tha magar wo aashiq-e-asia

harif tha ahl-e-maghrib ka wo

KHitab jis ko diya tha qaum ne us ki

wahi tha shair-e-mashriq

tha wo muballigh islam ka be-shak

ki islam hai amn-o-rahat ka mazhab

wo tha ek mard-e-kaamil insan mukammal

garche tha barahman-zada kashmir ka

nazar mein us ki tha dewta sa

watan ki miTTi ka har ek zarra

KHirad thi us ki nigah mein hech-o-past

junun-e-ishq ka tha wo dil se qail

wo tha ek paighambar ilm-o-amal ka

thi na mahdud shaeri us ki

na tha mahdud daera us ke paigham ka

the muKHatab us ke sari duniya ke aam-o-KHas

kisanon mazduron ka tha wo hami

kah gaya wo apne sher mein

jis khet se dahqan ko mayassar na ho rozi

us khet ke har KHosha-e-gandum ko jala do