nazr-e-nanak

hind meñ saikḌoñ paidā hue yuuñ to rahbar

kaun saanī hai tirā kaun hai terā ham-sar

jab bhī tārīḳh ke safhāt ulaT kar dekhe

sirf nezoñ pe saje ham ne vahāñ sar dekhe

koī insān kī azmat kā parastār nahīñ

koī bhī jins-e-mohabbat kā ḳharīdār nahīñ

haañ magar tujh pe nazar aa ke Thahar jaatī hai

tere har lafz se iḳhlās kī bū aatī hai

tū muvahhid hai ki rahmat hai tirī fikr-o-nazar

jis kā punjab pe saaya hai vahī tū hai shajar

mehr-e-aḳhlāq se utrā tū ujālā ban kar

arz-e-punjab kī qismat kā sitārā ban kar

qalb-e-insāñ ko mohabbat kā ḳhazāna baḳhshā

nutq-e-ranjīda ko ḳhushiyoñ kā tarāna baḳhshā

qasr-e-tauhīd kā ik burj-e-munavvar tū hai

gulshan-e-haq ke liye bū-e-gul-e-tar tū hai

tere paiġhām se har pīr-o-javāñ vāqif hai

ek punjab hī kyā saarā jahāñ vāqif hai

hind mein saikDon paida hue yun to rahbar

kaun sani hai tera kaun hai tera ham-sar

jab bhi tariKH ke safhat ulaT kar dekhe

sirf nezon pe saje hum ne wahan sar dekhe

koi insan ki azmat ka parastar nahin

koi bhi jins-e-mohabbat ka KHaridar nahin

han magar tujh pe nazar aa ke Thahar jati hai

tere har lafz se iKHlas ki bu aati hai

tu muwahhid hai ki rahmat hai teri fikr-o-nazar

jis ka punjab pe saya hai wahi tu hai shajar

mehr-e-aKHlaq se utra tu ujala ban kar

arz-e-punjab ki qismat ka sitara ban kar

qalb-e-insan ko mohabbat ka KHazana baKHsha

nutq-e-ranjida ko KHushiyon ka tarana baKHsha

qasr-e-tauhid ka ek burj-e-munawwar tu hai

gulshan-e-haq ke liye bu-e-gul-e-tar tu hai

tere paigham se har pir-o-jawan waqif hai

ek punjab hi kya sara jahan waqif hai