نذر ساحرؔ

وجد میں ہے جہان شعر و سخن

سحر ساحر کی حکمرانی ہے

چشمۂ فیض شاعری اس کی

اس کے ہر شعر میں روانی ہے

اس کی پیری ہے ترجمان شباب

اس کے شعروں میں نوجوانی ہے

اہل محفل ہیں جس کے شیدائی

اس کا انداز خوش بیانی ہے

یہ حسینی ہے برہمن ہمدم

اس کا ہر شعر جاودانی ہے

اس کا ایماں ہے جان یکجہتی

اس کی فطرت میں مہربانی ہے

دل یہ ہندو کا جاں مسلماں کی

یہ صفت اس کی خاندانی ہے

جن بزرگوں پہ تھا وطن کو ناز

ان بزرگوں کی یہ نشانی ہے

اس پہ سایہ ہے کامیابی کا

اس کی قسمت میں کامرانی ہے

جعفریؔ شاعری میں ساحرؔ کی

ہر دکھی دل کی ترجمانی ہے