nazr-e-sauda

kahne ko aam rasm-e-shikāyāt ho ga.ī

lab tak na aa.ī baat magar baat ho ga.ī

hañs hañs ke pī liye ġham-e-daurāñ ke talḳh jaam

yuuñ sāzgār gardish-e-hālāt ho ga.ī

zindāñ kī shab nazar ke ujāle ḳhayāl-e-dost

yakjā hue to pursish-e-hālāt ho ga.ī

mahviyyat-e-hikāyat-e-daurāñ na pochhiye

kab din huā ḳhabar nahīñ kab raat ho ga.ī

jo āsmāñ-nashīñ haiñ unheñ is kā ilm hai

jab bhī zamīñ par aa.e unheñ maat ho ga.ī

gulshan qafas bahār garebāñ junūñ ḳhirad

marbūt in se bazm-e-ḳharābāt ho ga.ī

'sahbā' asar nigāh kī allāh re kashmakash

nīñdoñ meñ kaif-o-kam kī shurūāt ho ga.ī

kahne ko aam rasm-e-shikayat ho gai

lab tak na aai baat magar baat ho gai

hans hans ke pi liye gham-e-dauran ke talKH jam

yun sazgar gardish-e-haalat ho gai

zindan ki shab nazar ke ujale KHayal-e-dost

yakja hue to pursish-e-haalat ho gai

mahwiyyat-e-hikayat-e-dauran na pochhiye

kab din hua KHabar nahin kab raat ho gai

jo aasman-nashin hain unhen is ka ilm hai

jab bhi zamin par aae unhen mat ho gai

gulshan qafas bahaar gareban junun KHirad

marbut in se bazm-e-KHarabaat ho gai

'sahba' asar nigah ki allah re kashmakash

nindon mein kaif-o-kam ki shuruat ho gai