nazr-e-tagore

kyā naġhma-hā-e-kaif kā dariyā bahā gayā

ḳhud husn ko jahāñ meñ hasīñ-tar banā gayā

ai shā.ir-e-shabāb-o-navv-sanj-e-zindagī

misl-e-bahār aa ke tū aalam pe chhā gayā

tū husn kī nigāh thā aur ishq kī zabāñ

gītoñ meñ rañg-o-rūp kī duniyā basā gayā

rañgīniyāñ bahār kī har sū bikhar ga.ī

be-kaifī-e-ḳhizāñ kā kabhī rañg chhā gayā

TuuTe hue diloñ kī sadā lab pe aa ga.ī

naġhma kabhī tū kaif-o-masarrat kā gā gayā

insāñ ke ġham meñ sīna-e-qudrat bhī shaq huā

maañ kī tarah se maut ko bhī pyaar aa gayā

afsurda zindagī ko milī tujh se tāzgī

jo dil taḌap rahā thā vo ārām pā gayā

tū kar ke sar-buland vatan ke vaqār ko

dil meñ har ek fard-e-vatan ke samā gayā

hindostāñ ko de ke do-ālam kī azmateñ

tū be-navā faqīr sā gaatā chalā gayā

kya naghma-ha-e-kaif ka dariya baha gaya

KHud husn ko jahan mein hasin-tar bana gaya

ai shair-e-shabab-o-naww-sanj-e-zindagi

misl-e-bahaar aa ke tu aalam pe chha gaya

tu husn ki nigah tha aur ishq ki zaban

giton mein rang-o-rup ki duniya basa gaya

ranginiyan bahaar ki har su bikhar gai

be-kaifi-e-KHizan ka kabhi rang chha gaya

TuTe hue dilon ki sada lab pe aa gai

naghma kabhi tu kaif-o-masarrat ka ga gaya

insan ke gham mein sina-e-qudrat bhi shaq hua

man ki tarah se maut ko bhi pyar aa gaya

afsurda zindagi ko mili tujh se tazgi

jo dil taDap raha tha wo aaram pa gaya

tu kar ke sar-buland watan ke waqar ko

dil mein har ek fard-e-watan ke sama gaya

hindostan ko de ke do-alam ki azmaten

tu be-nawa faqir sa gata chala gaya