nazr-e-tagore

mirī kalā merī shā.irī mere fan kā us ko salām pahuñche

ki jis ne mashriq kī azmatoñ ko atā kiye zindagī ke paikar

jo satvateñ ḳhvāb ho chukī thiiñ jo rif.ateñ past ho chukī thiiñ

unheñ jagā kar unheñ sajā kar banā diyā āsmāñ kā ham-sar

bhaTak rahī thī vatan kī hastī ġhulām rūhoñ ke kārvāñ meñ

shu.ūr-e-āzādī us ko de kar banā diyā asr-e-nau kā rahbar

mirī navāoñ meñ shoḳh tarz-e-suḳhan kā us ko salām pahoñche

ki jis ne mashriq kī sarzamīñ ko na.e jahāñ kā ufuq banāyā

nizām-e-tahsīl-e-ilm badlā nayā tasavvur adab ko baḳhshā

lalit-kalāoñ ko shāñtī ke hasīn unvān se sajāyā

shafaq kī mehñdī dhanak ke kañgan churā.e aur kahkashāñ kī afshāñ

baḌe jatan se hasīna-e-shā.irī ko jis ne dulhan banāyā

'sarosh' mere shu.ūr ke bāñkpan kā us ko salām pahuñche

sharāb-e-mashriq ke jaam chhalkā.e jis ne maġhrib ke mai-kadoñ meñ

musavvir-e-tal.at-e-nigārāñ muġhannī-e-shaukat-e-bahārāñ

haiñ maujzan kā.enāt ke dil kī dhaḌkaneñ jis ke chahchahoñ meñ

sukūt-e-shab raqs-e-māh-o-anjum fazā ke shāne sabā kī zulfeñ

nigār-e-fitrat kī har adā kā jamāl hai jis ke zamzamoñ meñ

maiñ rūh-e-tagore tere dar par aqīdat-e-sar jhukā rahā huuñ

tire tasavvur meñ naġhma-zan huuñ maiñ terī hī lai meñ gā rahā huuñ

tire taḳhayyul tire tafakkur tire tadabbur ke phuul chun kar

maiñ apne fan apne daur apne vatan kī mahfil sajā rahā huuñ

meri kala meri shairi mere fan ka us ko salam pahunche

ki jis ne mashriq ki azmaton ko ata kiye zindagi ke paikar

jo satwaten KHwab ho chuki thin jo rifaten past ho chuki thin

unhen jaga kar unhen saja kar bana diya aasman ka ham-sar

bhaTak rahi thi watan ki hasti ghulam ruhon ke karwan mein

shuur-e-azadi us ko de kar bana diya asr-e-nau ka rahbar

meri nawaon mein shoKH tarz-e-suKHan ka us ko salam pahonche

ki jis ne mashriq ki sarzamin ko nae jahan ka ufuq banaya

nizam-e-tahsil-e-ilm badla naya tasawwur adab ko baKHsha

lalit-kalaon ko shanti ke hasin unwan se sajaya

shafaq ki mehndi dhanak ke kangan churae aur kahkashan ki afshan

baDe jatan se hasina-e-shairi ko jis ne dulhan banaya

'sarosh' mere shuur ke bankpan ka us ko salam pahunche

sharab-e-mashriq ke jam chhalkae jis ne maghrib ke mai-kadon mein

musawwir-e-talat-e-nigaran mughanni-e-shaukat-e-bahaaran

hain maujzan kaenat ke dil ki dhaDkanen jis ke chahchahon mein

sukut-e-shab raqs-e-mah-o-anjum faza ke shane saba ki zulfen

nigar-e-fitrat ki har ada ka jamal hai jis ke zamzamon mein

main ruh-e-tagore tere dar par aqidat-e-sar jhuka raha hun

tere tasawwur mein naghma-zan hun main teri hi lai mein ga raha hun

tere taKHayyul tere tafakkur tere tadabbur ke phul chun kar

main apne fan apne daur apne watan ki mahfil saja raha hun