nazrana-e-KHulus

raat kī shāḳh pe khilte hue tāroñ ke gulāb

nik.hat-o-nūr kī manzil kā pata dete haiñ

saaz betāb hai mizrāb kī jumbish ke liye

giit raqqāsa-e-hastī ko sadā dete haiñ

jis kī āvāz meñ fardā kī khanak shāmil hai

ik ubharte hue sūraj kī chamak shāmil hai

jis kī tābish se shuāoñ kī phuvāreñ phūTīñ

jis se pur-haul añdheroñ kā jigar kaañp uThe

phuul kī tarah subuk teġh kī mānind girāñ

jis ke ehsās se zulmat kī sipar kaañp uThe

jis ke saa.e meñ umīdoñ ko javāñ honā hai

rif.at-e-ishq ko sarmāya-e-jāñ honā hai

zindagī Thos haqīqat hai koī ḳhvāb nahīñ

phir bhī ik umr banī rahtī hai dīvāne kā ḳhvāb

in haqā.eq ko bhalā kaun bhulā saktā hai

saḳht hālāt ke tapte hue vīrāne kā ḳhvāb

bistar-e-maḳhmal-o-sanjāb bhī yaad aatā hai

ġham-o-ālām kā zahrāb bhī yaad aatā hai

ye mahakte hue gajre ye lahakte hue phuul

in pe mustaqbil-e-zarrīñ kā gumāñ hai ki nahīñ

ek ehsās-e-bashar ke liye ḳhushbu-e-visāl

laakh nāzuk ho magar bār-e-garāñ hai ki nahīñ

jazba-e-soz-e-darūñ aaj giraftār huā

ek shā.ir kā junūñ aaj giraftār huā

raat ki shaKH pe khilte hue taron ke gulab

nikhat-o-nur ki manzil ka pata dete hain

saz betab hai mizrab ki jumbish ke liye

git raqqasa-e-hasti ko sada dete hain

jis ki aawaz mein farda ki khanak shamil hai

ek ubharte hue suraj ki chamak shamil hai

jis ki tabish se shuaon ki phuwaren phuTin

jis se pur-haul andheron ka jigar kanp uThe

phul ki tarah subuk tegh ki manind giran

jis ke ehsas se zulmat ki sipar kanp uThe

jis ke sae mein umidon ko jawan hona hai

rifat-e-ishq ko sarmaya-e-jaan hona hai

zindagi Thos haqiqat hai koi KHwab nahin

phir bhi ek umr bani rahti hai diwane ka KHwab

in haqaeq ko bhala kaun bhula sakta hai

saKHt haalat ke tapte hue virane ka KHwab

bistar-e-maKHmal-o-sanjab bhi yaad aata hai

gham-o-alam ka zahrab bhi yaad aata hai

ye mahakte hue gajre ye lahakte hue phul

in pe mustaqbil-e-zarrin ka guman hai ki nahin

ek ehsas-e-bashar ke liye KHushbu-e-visal

lakh nazuk ho magar bar-e-garan hai ki nahin

jazba-e-soz-e-darun aaj giraftar hua

ek shair ka junun aaj giraftar hua