nek-dil laDkiyo

nek dil laḌkiyo

aarzū kī numā.ish se guzro to chāroñ taraf dekhnā

aur phir jab tumhāre lahū meñ kisī kā lahū sarsarā.e

sitāroñ meñ āñkheñ chhupā kar duā māñgnā

qaidiyoñ shā.iroñ aur mahkūm ābādiyoñ ke liye

aur bīmār bachchoñ kī maañ ke liye

aur phir narm hoñToñ kī hiddat se

jab chhātiyoñ meñ havā sansanātī suno

nek-dil laḌkiyo yaad karnā unheñ jin kī qīmat bhī likkhe hue dā.ere

ek se raat din aur tanhā.iyāñ haiñ

hamāre liye chāñd nikle na nikle ki Tahniyoñ se bichhaḌ ke sambhalne na paa.e

havāoñ ke kandhoñ pe rote hue duur hote ga.e

aur jab lauTne kī hadoñ se bhī aage nikal aa.e

pīchhe se āvāz aa.ī palaT aao

ham ne tumhāre liye aaj aañsū bahā.e haiñ

ham raat ke mehmāñ haiñ magar nek-dil laḌkiyo

aarzū kī numā.ish meñ chāroñ taraf dekhnā

aur āñkhoñ kī tahrīr paḌhnā

hamārī taraf jab tumhāre safar kā musāfir havā ke sitam se guzarne lage

us se kahnā Thahar jaao

mere lahū meñ tumhāre liye aarzū hai

to ai nek-dil laḌkiyo alvidā.a

yaad rakhnā hamārī haqīqat se guzro to aañsū bahā kar duā māñgnā

qaidiyoñ shā.iroñ aur mahkūm ābādiyoñ ke liye

aur bīmār bachchoñ kī maañ ke liye

aur us ke liye jo tumhāre badan kā musāfir hai lekin

hamāre safar kī shahādat hai

nek dil laDkiyo

aarzu ki numaish se guzro to chaaron taraf dekhna

aur phir jab tumhaare lahu mein kisi ka lahu sarsarae

sitaron mein aankhen chhupa kar dua mangna

qaidiyon shairon aur mahkum aabaadiyon ke liye

aur bimar bachchon ki man ke liye

aur phir narm honTon ki hiddat se

jab chhatiyon mein hawa sansanati suno

nek-dil laDkiyo yaad karna unhen jin ki qimat bhi likkhe hue daere

ek se raat din aur tanhaiyan hain

hamare liye chand nikle na nikle ki Tahniyon se bichhaD ke sambhalne na pae

hawaon ke kandhon pe rote hue dur hote gae

aur jab lauTne ki hadon se bhi aage nikal aae

pichhe se aawaz aai palaT aao

hum ne tumhaare liye aaj aansu bahae hain

hum raat ke mehman hain magar nek-dil laDkiyo

aarzu ki numaish mein chaaron taraf dekhna

aur aankhon ki tahrir paDhna

hamari taraf jab tumhaare safar ka musafir hawa ke sitam se guzarne lage

us se kahna Thahar jao

mere lahu mein tumhaare liye aarzu hai

to ai nek-dil laDkiyo alwidaa

yaad rakhna hamari haqiqat se guzro to aansu baha kar dua mangna

qaidiyon shairon aur mahkum aabaadiyon ke liye

aur bimar bachchon ki man ke liye

aur us ke liye jo tumhaare badan ka musafir hai lekin

hamare safar ki shahadat hai