nim hakim KHatra-e-jaan

kal huā shab ko jo minTo road par merā guzar

ik dukāñ par ittifāqan ik tabīb aaya nazar

us dukāñ ke sāmne ek board thā laTkā huā

jis pe thā rangīn pairā.e meñ ye likkhā huā

shaiḳh budhdhan sar-zamīn-e-hind kī rūh-e-ravāñ

rahnumā-e-tibb-e-yūnānī masīhā-e-zamāñ

ek bosīda sanad thī dar pe laTkā.ī huī

jo kisī attār-e-kāmil se thī likhvā.ī huī

sāmne the chand Dabbe jin meñ thiiñ kuchh goliyāñ

muddatoñ kī ek botal meñ thī rūh-e-bādbāñ

paas aaya gar koī un ko masīhā jaan kar

so gayā ārām se do din meñ chādar taan kar

saiñkaḌoñ bīmār nazr-e-maut yūñhī ho ga.e

un ke hāthoñ zindagī se haath kitne dho ga.e

āj-kal ye hind meñ hai tibb-e-yūnānī kā haal

maut ke har ek goshe meñ bichhā rakkhe haiñ jaal

har galī meñ haiñ hakīmoñ kī dukāneñ be-shumār

ek sau bīmār agar haiñ to atibbā ik hazār

har dar-o-dīvār pe chaspāñ haiñ un ke ishtihār

fan ke jo māhir the vo bhī ho ga.e be-e'tibār

thī kabhī ye tib haqīqat meñ masīhā-e-zamāñ

ek din ye hai ki ḳhud hī le rahī hai hichkiyāñ

kyā kare vo har tarah majbūr hai nā-chār hai

kyā masīhā.ī kare jab aap hī bīmār hai

in hakīmoñ kā jahāñ meñ gar yahī aalam rahā

dekh lenā garm bāzār-e-ajal ho jā.egā

kal hua shab ko jo minTo road par mera guzar

ek dukan par ittifaqan ek tabib aaya nazar

us dukan ke samne ek board tha laTka hua

jis pe tha rangin pairae mein ye likkha hua

shaiKH budhdhan sar-zamin-e-hind ki ruh-e-rawan

rahnuma-e-tibb-e-yunani masiha-e-zaman

ek bosida sanad thi dar pe laTkai hui

jo kisi attar-e-kaamil se thi likhwai hui

samne the chand Dabbe jin mein thin kuchh goliyan

muddaton ki ek botal mein thi ruh-e-baadban

pas aaya gar koi un ko masiha jaan kar

so gaya aaram se do din mein chadar tan kar

sainkaDon bimar nazr-e-maut yunhi ho gae

un ke hathon zindagi se hath kitne dho gae

aaj-kal ye hind mein hai tibb-e-yunani ka haal

maut ke har ek goshe mein bichha rakkhe hain jal

har gali mein hain hakimon ki dukanen be-shumar

ek sau bimar agar hain to atibba ek hazar

har dar-o-diwar pe chaspan hain un ke ishtihaar

fan ke jo mahir the wo bhi ho gae be-e'tibar

thi kabhi ye tib haqiqat mein masiha-e-zaman

ek din ye hai ki KHud hi le rahi hai hichkiyan

kya kare wo har tarah majbur hai na-chaar hai

kya masihai kare jab aap hi bimar hai

in hakimon ka jahan mein gar yahi aalam raha

dekh lena garm bazar-e-ajal ho jaega