nim ka peD

hamāre ghar ke bāhar niim kā ik peḌ thā pahle

tumheñ bhī yaad hogā ham vahīñ pe khelā karte the

usī kī god meñ rakhte the sab farmā.ishī parche

kisī jaadū se puurā kar rahā hai ye samajhte the

sunā hai in dinoñ kuchh aur kaḌvā ho gayā hai vo

haiñ patte zard pahle se zarā sā jhuk gayā hai vo

guzarne vaale logoñ pe vo kaḌve phal girātā hai

baḌe ġhusse meñ jaise koī būḌhā baḌbaḌātā hai

kabhī chup-chāp phir hai dekhtā ummīd se kuchh yuuñ

ki jaise kah rahā ho paas aa to maiñ bhī kuchh pūchhūñ

chalo kuchh roz kī chhuTTī nikāleñ ghuum kar aa.eñ

parinde kitne haiñ ab rābte meñ dekh kar aa.eñ

usī miTTī meñ kuchh yādeñ hamārī bhī gaḌī hoñgī

vahīñ us kī bhī kuchh farmā.isheñ sūkhī paḌī hoñgī

hamāre pūchh lene hī se shāyad khil uThegā vo

hameñ nazdīk pā ke pahle jaise phir khulegā vo

yaqīnan kuchh ḳhushī ham ko bhī to mahsūs hī hogī

kahīñ raste meñ dikhtā hai agar koī shajar mujh ko

to fauran yaad aatā hai yahī bas āj-kal mujh ko

hamāre ghar ke bāhar niim kā ik peḌ thā pahle

hamare ghar ke bahar nim ka ek peD tha pahle

tumhein bhi yaad hoga hum wahin pe khela karte the

usi ki god mein rakhte the sab farmaishi parche

kisi jadu se pura kar raha hai ye samajhte the

suna hai in dinon kuchh aur kaDwa ho gaya hai wo

hain patte zard pahle se zara sa jhuk gaya hai wo

guzarne wale logon pe wo kaDwe phal giraata hai

baDe ghusse mein jaise koi buDha baDbaData hai

kabhi chup-chap phir hai dekhta ummid se kuchh yun

ki jaise kah raha ho pas aa to main bhi kuchh puchhun

chalo kuchh roz ki chhuTTi nikalen ghum kar aaen

parinde kitne hain ab rabte mein dekh kar aaen

usi miTTi mein kuchh yaaden hamari bhi gaDi hongi

wahin us ki bhi kuchh farmaishen sukhi paDi hongi

hamare puchh lene hi se shayad khil uThega wo

hamein nazdik pa ke pahle jaise phir khulega wo

yaqinan kuchh KHushi hum ko bhi to mahsus hi hogi

kahin raste mein dikhta hai agar koi shajar mujh ko

to fauran yaad aata hai yahi bas aaj-kal mujh ko

hamare ghar ke bahar nim ka ek peD tha pahle