nind

ai tabīb-e-alam-e-mahrūmāñ

chāra-farmā-e-humūm-o-afkār

tujh se āshufta-sarī kā darmāñ

haiñ shifāyāb tujhī se bīmār

hai mudabbir tū hī nature ke shifā-ḳhāne kī

tū hī lā-raib hai mai ziist ke paimāne kī

bā'is-e-ḳhurramī-o-ḳhush-hālī

ḳhastā-hāloñ ke liye ek iksīr

kaayā nature kī palaTne vaalī

aap be-shub.ha hai tū apnī nazīr

sitam jo zāhir meñ hai bātin meñ hai tū rūh-afzā

maut zāhir meñ hai bātin meñ sabab jiine kā

dahr ne jin ko satā rakkhā hai

jin ko hai ziist kā har lahza vabāl

jin ko nākāmiyoñ ne gherā hai

jin ko duniyā meñ na sarvat hai na maal

aisoñ kā ġham ġhalat ik do ghaḌī kartī hai tū

dast-e-shafqat dil-e-pazh-murda pe dhartī hai tū

jo haiñ mast-e-mai-e-'ishrat un kī

zindagī be-tire hotī hai harām

hai ġharaz sab ko zarūrat terī

chain tujh se hai tujhī se ārām

chāñdnī shab nam-e-shabnam meñ mazā tere sabab

pyārī pyārī nazar aatī hai sabā tere sabab

ai tabib-e-alam-e-mahruman

chaara-farma-e-humum-o-afkar

tujh se aashufta-sari ka darman

hain shifayab tujhi se bimar

hai mudabbir tu hi nature ke shifa-KHane ki

tu hi la-raib hai mai zist ke paimane ki

ba'is-e-KHurrami-o-KHush-haali

KHasta-haalon ke liye ek iksir

kaya nature ki palaTne wali

aap be-shubha hai tu apni nazir

sitam jo zahir mein hai baatin mein hai tu ruh-afza

maut zahir mein hai baatin mein sabab jine ka

dahr ne jin ko sata rakkha hai

jin ko hai zist ka har lahza wabaal

jin ko nakaamiyon ne ghera hai

jin ko duniya mein na sarwat hai na mal

aison ka gham ghalat ek do ghaDi karti hai tu

dast-e-shafqat dil-e-pazh-murda pe dharti hai tu

jo hain mast-e-mai-e-'ishrat un ki

zindagi be-tire hoti hai haram

hai gharaz sab ko zarurat teri

chain tujh se hai tujhi se aaram

chandni shab nam-e-shabnam mein maza tere sabab

pyari pyari nazar aati hai saba tere sabab