nind

niiñd ik jazīra hai

jis meñ ḳhvāb baste haiñ

vādiyāñ haiñ jhīleñ haiñ

murġh-zār-o-gulshan haiñ

dil-nashīn chehre haiñ

log is jazīre meñ

ḳhvāb lene jaate haiñ

ḳhvāb zindagānī ke

ḳhvāb shādmānī ke

ḳhvāb kāmrānī ke

jin kī zindagānī meñ

koī sukh nahīñ hotā

ik jahān-e-mahrūmī

jin ke saath chaltā hai

niiñd ke jazīre meñ

apnī saarī mahrūmī

jā ke bhuul jaate haiñ

zindagī ke dīvāne

niiñd ke jazīre se

ḳhvāb le ke aate haiñ

aur is kī ta.abīreñ

jab kahīñ nahīñ miltīñ

niiñd ke jazīre meñ

phir se lauT jaate haiñ

nind ek jazira hai

jis mein KHwab baste hain

wadiyan hain jhilen hain

murgh-zar-o-gulshan hain

dil-nashin chehre hain

log is jazire mein

KHwab lene jate hain

KHwab zindagani ke

KHwab shadmani ke

KHwab kaamrani ke

jin ki zindagani mein

koi sukh nahin hota

ek jahan-e-mahrumi

jin ke sath chalta hai

nind ke jazire mein

apni sari mahrumi

ja ke bhul jate hain

zindagi ke diwane

nind ke jazire se

KHwab le ke aate hain

aur is ki tabiren

jab kahin nahin miltin

nind ke jazire mein

phir se lauT jate hain