nirwan

ik ḳhushbū dard-e-sar kī murjhā.ī kaliyoñ ko khilā.e jaatī hai

zehn meñ bichchhū ummīdoñ ke Dañk lagāte haiñ

hichkī le kar phir ḳhud hī mar jaate haiñ

dil kī dhaḌkan sachchā.ī ke talḳh dhueñ ko gahrā kartī paiham baḌhtī jaatī hai

peT meñ bhuuk Dakāreñ letī rahtī hai

phir rag rag meñ sūiyāñ ban kar bhāgī bhāgī phirtī hai

puure jism meñ dard kā ik laavā sā bahtā rahtā hai

aisā mujh ko lagtā hai

jaise maiñ

āḳhirī qai meñ is duniyā kī saarī ġhizā.eñ ḳhvāb o haqīqat kī ālā.ish

ādarshoñ kī mīThī sharābeñ

ik be-ma.anī kashish meñ uljhā

ye jīvan

saarā kā saarā ugal dūñgā

shāyad mujh ko is lamhe nirvān mile

ek KHushbu dard-e-sar ki murjhai kaliyon ko khilae jati hai

zehn mein bichchhu ummidon ke Dank lagate hain

hichki le kar phir KHud hi mar jate hain

dil ki dhaDkan sachchai ke talKH dhuen ko gahra karti paiham baDhti jati hai

peT mein bhuk Dakaren leti rahti hai

phir rag rag mein suiyan ban kar bhagi bhagi phirti hai

pure jism mein dard ka ek lawa sa bahta rahta hai

aisa mujh ko lagta hai

jaise main

aaKHiri qai mein is duniya ki sari ghizaen KHwab o haqiqat ki aalaish

aadarshon ki miThi sharaben

ek be-mani kashish mein uljha

ye jiwan

sara ka sara ugal dunga

shayad mujh ko is lamhe nirwan mile