nirwan

maiñ jab andhā ho jā.ūñgā

tab tum merī āñkheñ ban kar

taaza khilne vaale phūloñ

bachchoñ ke gāloñ par utre rangoñ aur

parindoñ ke baare meñ mujhe batānā

jab merī zabāñ par

angāroñ ke chhāj ulTā.e jā.eñge

tab tum milne-julne vāloñ se

daraḳhtoñ se bādaloñ aur sitāroñ se

vo bāteñ karnā jo maiñ ne barsoñ sochīñ

jab mere paaoñ thak jā.eñge

tab tum un pagDanDiyoñ kī ghaas harī rakhnā

jin par mere bachpan aur laḌakpan kī

dhuul abhī tak uḌtī hai

aur maiñ jab mar jā.ūñ to

tum mere māthe par ik bosa

aur siine par ik phuul rakh denā

kyūñki rone-dhone vaale logoñ kī

us bhiiḌ meñ ek tum hī hoñgī

jo mere sukh ko samajh sakogī

main jab andha ho jaunga

tab tum meri aankhen ban kar

taza khilne wale phulon

bachchon ke galon par utre rangon aur

parindon ke bare mein mujhe batana

jab meri zaban par

angaron ke chhaj ulTae jaenge

tab tum milne-julne walon se

daraKHton se baadalon aur sitaron se

wo baaten karna jo main ne barson sochin

jab mere paon thak jaenge

tab tum un pagDanDiyon ki ghas hari rakhna

jin par mere bachpan aur laDakpan ki

dhul abhi tak uDti hai

aur main jab mar jaun to

tum mere mathe par ek bosa

aur sine par ek phul rakh dena

kyunki rone-dhone wale logon ki

us bhiD mein ek tum hi hongi

jo mere sukh ko samajh sakogi