no man land

kis se pūchhūñ vajūd ko apne

kaun hai jo sabab batā.egā

kis zamīñ se mirā ta'alluq hai

kaun husn-e-talab batā.egā

ḳhār-dāroñ meñ muddatoñ se asiir

kis ne samjhī hai bebasī merī

na jalā.ī ga.ī na dafn huī

ek mayyat hai zindagī merī

silsila duur tak hai kāñToñ kā

rāh-e-masdūd ho ga.ī huuñ maiñ

koī aahaT kisī qadam kī nahīñ

ḳhud meñ mahdūd ho ga.ī huuñ maiñ

chaar jānib ajiib pahre haiñ

sirf jūtoñ kī chaap suntī huuñ

sunte sunte ye chaap barsoñ se

ḳhauf ke dā.ere se buntī huuñ

haul-nākī meñ saañs letī huuñ

har taraf fauj sī hai chaar taraf

utre utre udaas chehre haiñ

ik ajab be-kasī hai chaar taraf

koī merī taraf nahīñ aatā

vasvasoñ kā ajab tamāsha hai

maiñ darūn-e-ḳhulūs sarhad huuñ

kaisī bechārgī kā rishta hai

na koī fasl hai na koī kisān

na koī hal hai aur na hariyālī

ug rahe haiñ babūl siine par

ab yahāñ kaun aa.egā maalī

dekhtī huuñ ki donoñ jānib se

log paidal nikal ke jaate haiñ

apne qadmoñ se donoñ mulk ke log

merā siina kuchal ke jaate haiñ

mere baare meñ kis ne sochā hai

maiñ bhī dhartī kā yak hissa huuñ

pāñch dariyāoñ kī maiñ beTī huuñ

donoñ jismoñ kā ek saaya huuñ

maiñ bhī bhisham kī tarah ghāyal huuñ

maiñ ne apnoñ ke tiir khaa.e haiñ

sochtī huuñ ki kaun hai apnā

apne hī log kyoñ parā.e haiñ

ḳhār-dāroñ ke paar vaale ye log

roz dhartī ko bāñjh karte haiñ

ta.assub aur be-sabab jhagḌe

kitne balvoñ meñ log marte haiñ

donoñ jānib kī sarzamīn ke log

kaise kirdār ye nibhāte haiñ

sochtī huuñ to sahm jaatī huuñ

ye manāzir bahut Darāte haiñ

maiñ kabhī badduā nahīñ kartī

un ke haq meñ duā hī kartī huuñ

apnī ḳhushbū ye chhoḌ jaate haiñ

un kī ḳhushbū se hī maiñ Dartī huuñ

maiñ vo hissa huuñ jis pe sadiyoñ se

ḳhauf-e-āseb aa ke rahte haiñ

kyoñ mirā naam pūchhte ho tum

mujh ko no man's land kahte haiñ

donoñ jānib zamīn ke hisse

mujh se do haath baḌh ke bekal haiñ

kah ke ye ḳhud ko de rahī huuñ sukūn

donoñ jānib ke log pāgal haiñ

kis se puchhun wajud ko apne

kaun hai jo sabab bataega

kis zamin se mera ta'alluq hai

kaun husn-e-talab bataega

KHar-daron mein muddaton se asir

kis ne samjhi hai bebasi meri

na jalai gai na dafn hui

ek mayyat hai zindagi meri

silsila dur tak hai kanTon ka

rah-e-masdud ho gai hun main

koi aahaT kisi qadam ki nahin

KHud mein mahdud ho gai hun main

chaar jaanib ajib pahre hain

sirf juton ki chap sunti hun

sunte sunte ye chap barson se

KHauf ke daere se bunti hun

haul-naki mein sans leti hun

har taraf fauj si hai chaar taraf

utre utre udas chehre hain

ek ajab be-kasi hai chaar taraf

koi meri taraf nahin aata

waswason ka ajab tamasha hai

main darun-e-KHulus sarhad hun

kaisi bechaargi ka rishta hai

na koi fasl hai na koi kisan

na koi hal hai aur na hariyali

ug rahe hain babul sine par

ab yahan kaun aaega mali

dekhti hun ki donon jaanib se

log paidal nikal ke jate hain

apne qadmon se donon mulk ke log

mera sina kuchal ke jate hain

mere bare mein kis ne socha hai

main bhi dharti ka yak hissa hun

panch dariyaon ki main beTi hun

donon jismon ka ek saya hun

main bhi bhisham ki tarah ghayal hun

main ne apnon ke tir khae hain

sochti hun ki kaun hai apna

apne hi log kyon parae hain

KHar-daron ke par wale ye log

roz dharti ko banjh karte hain

tassub aur be-sabab jhagDe

kitne balwon mein log marte hain

donon jaanib ki sarzamin ke log

kaise kirdar ye nibhate hain

sochti hun to sahm jati hun

ye manazir bahut Daraate hain

main kabhi baddua nahin karti

un ke haq mein dua hi karti hun

apni KHushbu ye chhoD jate hain

un ki KHushbu se hi main Darti hun

main wo hissa hun jis pe sadiyon se

KHauf-e-aseb aa ke rahte hain

kyon mera nam puchhte ho tum

mujh ko no man's land kahte hain

donon jaanib zamin ke hisse

mujh se do hath baDh ke bekal hain

kah ke ye KHud ko de rahi hun sukun

donon jaanib ke log pagal hain