no need of password

ham mohabbat kā password note-notepad par likh kar bhuul ga.e haiñ

magar terī āñkheñ na jaane kis jādūī mantar ke nam se dhulī haiñ

ki asiir kar letī haiñ mere dil kī dhaḌkanoñ ko apnī palkoñ kī larzish meñ

kisī password ke baġhair

jaise chāñd kī chāñdnī ko

raat apnī āġhosh meñ sameT letī hai

merī mohabbat apnī pyaas bujhātī hai

havā ke rath par savār ho kar sitāroñ kī oT meñ tumhārī

be-harf-o-saut ḳhud-kalāmī se ham-kalām ho kar

magar sūraj kī kirnoñ kī chubhan bikher detī hai us ḳhud-kalāmī ko din ke sahrā meñ

aañkh khul jaatī hai

aur kamra tere na hone ke dukh meñ Dagmagāne lagtā hai

kaash koī mahal-sarā ho jis kā chor darvāza

mujhe tujh se milāne vaale rāste kī taraf aap hī aap khul jaa.e

jahāñ ghane sabz aur phaldār daraḳhtoñ meñ pariyoñ kā hujūm istiqbāliya raqs ke urūjī marhale ko chhū rahā hai

mere sāhir

āsmān kī chhalnī se jhāñktī huī sitāroñ kī muskurāhaT kī qasam

terī āñkhoñ kī tapish se ek surma.ī laḌkī kī zaat pighalne lagī hai

aur ye vasl-āmez kohar hamārī ragoñ meñ dhīre dhīre sarāyat karne lagī hai

mere sāhir

mere shā.ir

password kī zarūrat nahīñ

hum mohabbat ka password note-notepad par likh kar bhul gae hain

magar teri aankhen na jaane kis jadui mantar ke nam se dhuli hain

ki asir kar leti hain mere dil ki dhaDkanon ko apni palkon ki larzish mein

kisi password ke baghair

jaise chand ki chandni ko

raat apni aaghosh mein sameT leti hai

meri mohabbat apni pyas bujhati hai

hawa ke rath par sawar ho kar sitaron ki oT mein tumhaari

be-harf-o-saut KHud-kalami se ham-kalam ho kar

magar suraj ki kirnon ki chubhan bikher deti hai us KHud-kalami ko din ke sahra mein

aankh khul jati hai

aur kamra tere na hone ke dukh mein Dagmagane lagta hai

kash koi mahal-sara ho jis ka chor darwaza

mujhe tujh se milane wale raste ki taraf aap hi aap khul jae

jahan ghane sabz aur phaldar daraKHton mein pariyon ka hujum istiqbaaliya raqs ke uruji marhale ko chhu raha hai

mere sahir

aasman ki chhalni se jhankti hui sitaron ki muskurahaT ki qasam

teri aankhon ki tapish se ek surmai laDki ki zat pighalne lagi hai

aur ye wasl-amez kohar hamari ragon mein dhire dhire sarayat karne lagi hai

mere sahir

mere shair

password ki zarurat nahin