andha kabaadi

shahr ke goshoñ meñ haiñ bikhre hue

pā-shikasta sar-burīda ḳhvāb

jin se shahr vaale be-ḳhabar!

ghūmtā huuñ shahr ke goshoñ meñ roz o shab

ki un ko jam.a kar luuñ

dil kī bhaTTī meñ tapā.ūñ

jis se chhaT jaa.e purānā mail

un ke dast-o-pā phir se ubhar aa.eñ

chamak uTTheñ lab o ruḳhsār o gardan

jaise nau-ārāsta dūlhoñ ke dil kī hasrateñ

phir se in ḳhvāboñ ko samt-e-rah mile!

''ḳhvāb le lo ḳhvāb....''

sub.h hote chauk meñ jā kar lagātā huuñ sadā

ḳhvāb aslī haiñ ki naqlī?''

yuuñ parakhte haiñ ki jaise un se baḌh kar

ḳhvāb-dāñ koī na ho!

ḳhvāb-gar maiñ bhī nahīñ

sūrat-gar-e-sānī huuñ bas

haañ magar merī ma.īshat kā sahārā ḳhvāb haiñ!

shaam ho jaatī hai

maiñ phir se lagātā huuñ sadā

muft le lo muft, ye sone ke ḳhvāb''

''muft'' sun kar aur Dar jaate haiñ log

aur chupke se sarak jaate haiñ log

''dekhnā ye ''muft'' kahtā hai

koī dhokā na ho?

aisā koī sho.abada pinhāñ na ho?

ghar pahuñch kar TuuT jaa.eñ

yā pighal jaa.eñ ye ḳhvāb?

bhak se uḌ jaa.eñ kahīñ

yā ham pe koī sehr kar Dāleñ ye ḳhvāb

jī nahīñ kis kaam ke?

aise kabāḌī ke ye ḳhvāb

aise nā-bīnā kabāḌī ke ye ḳhvāb!''

raat ho jaatī hai

ḳhvāboñ ke pulande sar pe rakh kar

muñh bisore lauTtā huuñ

raat bhar phir baḌbaḌātā huuñ

''ye le lo ḳhvāb....''

''aur le lo mujh se in ke daam bhī

ḳhvāb le lo, ḳhvāb

mere ḳhvāb

ḳhvāb mere ḳhvāb

ḳhvāb

in ke daam bhī''

shahr ke goshon mein hain bikhre hue

pa-shikasta sar-burida KHwab

jin se shahr wale be-KHabar!

ghumta hun shahr ke goshon mein roz o shab

ki un ko jama kar lun

dil ki bhaTTi mein tapaun

jis se chhaT jae purana mail

un ke dast-o-pa phir se ubhar aaen

chamak uTThen lab o ruKHsar o gardan

jaise nau-arasta dulhon ke dil ki hasraten

phir se in KHwabon ko samt-e-rah mile!

KHwab le lo KHwab

subh hote chauk mein ja kar lagata hun sada

KHwab asli hain ki naqli?

yun parakhte hain ki jaise un se baDh kar

KHwab-dan koi na ho!

KHwab-gar main bhi nahin

surat-gar-e-sani hun bas

han magar meri maishat ka sahaara KHwab hain!

sham ho jati hai

main phir se lagata hun sada

muft le lo muft, ye sone ke KHwab

muft sun kar aur Dar jate hain log

aur chupke se sarak jate hain log

dekhna ye muft kahta hai

koi dhoka na ho?

aisa koi shoabada pinhan na ho?

ghar pahunch kar TuT jaen

ya pighal jaen ye KHwab?

bhak se uD jaen kahin

ya hum pe koi sehr kar Dalen ye KHwab

ji nahin kis kaam ke?

aise kabaDi ke ye KHwab

aise na-bina kabaDi ke ye KHwab!

raat ho jati hai

KHwabon ke pulande sar pe rakh kar

munh bisore lauTta hun

raat bhar phir baDbaData hun

ye le lo KHwab

aur le lo mujh se in ke dam bhi

KHwab le lo, KHwab

mere KHwab

KHwab mere KHwab

KHwab

in ke dam bhi